Túrkistan oblysynyń Jetisaı aýdanyndaǵy sharýalar bıylǵy alǵashqy qaýyn ónimin jınaı bastady, dep habarlaıdy Egemen.kz.
«Ál-Farabı» sharýa qojalyǵy egistikten 65 tonna qaýyn jınady. Alǵashqy ónimin jınaǵan dıqandar bıyl egis alqaptaryna sýdyń turaqty jetkizilgenine rıza.
«20 gektar jerge qaýyn ektik. Sý jetkilikti boldy, eshqandaı tapshylyq kórgen joqpyz. Sý úzdiksiz berildi. Ýaqytyly sýarýdyń arqasynda mol ári erte ónim alyp otyrmyz», deıdi sharýa qojalyqtyń tóraǵasy Ál-Farabı Anarbaıuly. Jyl basynan beri Túrkistan oblysynyń aýyl sharýashylyǵy qajettilikterine 1 mlrd tekshe metrden astam sý berilgen. Onyń 293 mln tekshe metri Jetisaı aýdanyna tıesili. Aýdanda baqsha daqyldaryn sýarýǵa 49 mln tekshe metr sý jiberildi. Qazir baqsha daqyldaryn sýarý jumystary jalǵasyp jatyr. Aıta keteıik, bıyl sharýalar úshin dızel otynynyń baǵasy lıtrine 263 teńge deńgeıinde bekitildi. Alaıda túpkilikti baǵany óńirlik operatorlar anyqtaıdy, ol lıtrine 281 teńgeni quraıdy.