Búgin túnde Parıjdiń túbindegi Sen-Denı qalasynyń 80 myń oryndyq «Stad-de-Frans» dep atalatyn stadıonynda Fransııa men Portýgalııa quramalary Eýropa chempıondyǵy ataǵyn sarapqa salady.
Osyǵan oraı euro-2016 basylymy Djo Ýoker jáne Devıd Krossan degen sarapshylardyń atalmysh match jónindegi oı-pikirlerin suraǵan eken.
Djo Ýoker, Portýgalııa (@UEFAcomJoeW)
Ronaldý ózin tolyq ashyp kórsete ala ma?
Krıshtıaný Ronaldý Ýelspen ótken jartylaı fınaldyq oıynda keremet oıyn órnegin kórsetti. Biraq ol áli de óz deńgeıinen tómen oıyn kórsetip júr. Máselen, Islandııamen jáne Avstrııamen toptyq kezeńde ótken kezdesýlerde solaı boldy. Degenmen, Ronaldý óziniń osy kezge deıingi oıynshylyq mansabynda ylǵı derlik mańyzdy jekpe-jekterde keremet oınap kelip edi. Al jeksenbi kúni oınalatyn fınaldyq matchtyń solardyń bárinen de asyp túsedi. Eger biz fınalda munyń aldynda tap «vallılik aıdaharlardy» aýyzdyqtaǵan Ronaldýdy kóre alatyn bolsaq, Portýgalııanyń óz tarıhyndaǵy eń joǵary trofeıdi jeńip alýyna naqty múmkindik týar edi.
Pepeniń oralýy
Pepe, bálkim, jaraqat quramnan shyǵaryp tastamaǵanda, Portýgalııa quramasynyń Eýro-2016-daǵy eń úzdik oıynshysy bolar ma edi?! «Realdyń» qorǵaýshysynyń tájirıbesi men sheberligi Portýgalııa quramasyna qazir týrnırdiń bas mergeni Antýan Grızmanndy toqtatý úshin burynǵy qaı kezdegiden de artyq kerek bolyp tur. Brýný Alvesh buǵan deıin Garet Beıl bastaǵan vallılikterge laıyqty qarsylas bola bilgen, biraq Pepe endi Goızmann pen Olıve Jırýǵa odan kúshti qarsylas bolar edi.
Jartylaı qorǵanystyń qupııa qarýy
Adrıen Sılva jurt nazaryn ózine dál jas Renatý Sanshesh sekildi aýdara alǵan joq. Alaıda, onyń alań ortasynda atqaryp júrgen qara jumysyn baǵalamaý múmkin emes. Eger senbesińizder, 1/8 fınalda Portýgalııa «Sportınginiń» havbeginen asyp óte almaǵan horvat Lýka Modrıchten surańyzdar. Odan Polsha men Ýels quramalaryndaǵy qarsylastary da kóp tosqaýyl kórdi. Portýgal «tirek» oıynshysynyń kúsh-qýaty men yrǵaqty qozǵalysy endi Pol Pogba men onyń áriptesterin de buǵaýlaý úshin kerek bolady. Buǵan qosa, Sılva fransýz tilin óte jaqsy biledi, sondyqtan Dıde Desham shákirtteriniń ózara ne aıtysyp júrgenderin de túsinip qoıady. «Úsh tústiler» kombınasııalaryn buzyp tastap turýǵa osy jetkilikti bolar ma eken?
Devıd Krossan, Fransııa (@UEFAcomDavidC)
Grızmann faktory
Grızmann portýgaldardyń baıaý jınalatyn qorǵanys shebin buzyp ótý úshin taptyrmaıtyn tulǵa. Fransýzdardyń jetinshi nómirli oıynshysy týrnırde barynsha jarqyn, nátıjeli oıyn kórsetip júr. Onyń jyldam oılap, jyldam qozǵalatynyn jastary tıisinshe 32 men 33-tegi ortalyq qorǵaýshylar Joze Fonte men Pepege aıtarlyqtaı qıyn problemalar týǵyza alady. Komandalastary erkeletip aıtatyn Grızý forvard úshin kerekti orasan zor jumysty atqara júrip, búkil alańdy sharlap shyǵady. Sondyqtan onyń qysymynan portýgaldar qutyla almaıdy. Oǵan Jırý kúsh qosqanda, jaǵdaıdy odan beter aýyrlata túsedi.
Qorǵanysty qıratýshylar
Sóz joq, fransýzdar fınalda dopqa kóbirek egelik etetin bolady. Olar Germanııamen oıynǵa qaraǵanda (35%), úlesin kóp arttyryp jiberedi. Osynyń nátıjesinde Pogba men Dımıtrı Paıeniń portýgaldardyń bir tártipke baǵynǵan qorǵanys shebin buzyp shyǵýdyń múmkindikteri kóbeıe túsedi. Pogba týrnır barysynda shyńdalyp, qarqynǵa qarqyn qosty, al jartylaı fınalda jaqsy jaǵynan kórine almaǵan Paıe qatarynan eki oıyn boıy kóleńkede qalyp qoımaıtyn shyǵar.
Ronaldý Iýmtıtıge qarsy
Shamasy, Fransııa quramasy óziniń quramy jaǵynan Portýgalııadan asyp túsetin de shyǵar, biraq Fernandý Santýshtiń jeńiniń ushynda Ronaldý dep atalatyn kóziri bar. Eger eýropalyq brazılder kapıtanynyń oıyny jaqsy júrip ketse, jaqynda «Barselonaǵa» alynǵan Samıýel Iýmtıtıge, áı, eshbir ońaı tımeıdi-aý.
Eki qurama oıyndary men olardyń saptaryndaǵy oıynshylarǵa qysqasha sholý jasap ótken Djo men Devıd maýsym aıynyń basynan beri tıisinshe Portýgalııa jáne Fransııa komandalarynyń reporterleri bolyp jumys jasap keledi.
Damır QOJAMQUL