sheteldik bul júk kóliginiń bólshekteri Semeıde qurastyrylady
Semeı qalasyndaǵy iri kásiporyndardyń biri – «SemAZ» jaýapkershiligi shekteýli seriktestigi damýdyń jańa kezeńine aıaq basty. Qazaqstandyq quramdy arttyrý maqsatynda zaýytta qurastyrylatyn SHACMAN júk kólikteriniń shanaǵy men keıbir bólshekteri endi zaýyttyń ózinde shyǵaryla bastady. Bul óz kezeginde 50 adamǵa jumys kózin taýyp berip otyr.
Qaladaǵy kolledjderdiń birin aıaqtaǵanymen, uzaq ýaqyt jumyssyz júrgen Aıbek Orazbekov qyzmet ornyn atalǵan zaýyttan tapty. Eki apta boıy tájirıbeden ótip, jaqsy nátıjesimen kózge túsken avtomehanık jarty jyldyń ishinde júk kólikterin qurastyrýdyń qyr-syryn jetik meńgergen.
Men altynshy postta jumys isteımin. Kóliktiń kabınasyn quramyz, qubyrlar shyǵaramyz. Jumysym ózime unaıdy, dedi ol. Zaýytta kúnine 3-4 SHACMAN kóligi shyǵarylady. Osy úlgidegi qazaqstandyq quramnyń úlesi 38 paıyzǵa artyp otyr. Júk kólikterin qurastyrý boıynsha 120 adam eńbek etedi.
Kásiporynnyń óndiris basshysy Jandos Ilııasovtyń aıtýynsha, jyl sońyna deıin 400 dana tehnıka qurastyrý josparlanǵan. Alaıda, bul kórsetkishti suranysqa oraı eki esege deıin arttyrý múmkindigi bar.
Dýman ANASh,
«Egemen Qazaqstan»
SEMEI