Jaqynda oblys ákimi Beıbit Atamqulov oblystyń densaýlyq saqtaý nysandaryn aralap, materıaldyq-tehnıkalyq múmkindikterimen tanysqan bolatyn. Sonda qaladaǵy №1 perınataldy ortalyǵynyń tozyǵy jetken jabdyqtaryn jańartý maqsatynda kásipkerlerge oı tastaǵan.
Úkimet medısınalyq qural-jabdyqtarmen tolyq qamtamasyz etip otyr. Al oblys aýmaǵynda jasaýǵa bolatyn jasaý-jıhazdarmen qamtamasyz etýge bolady ǵoı.
Oblystyq kásipkerlik, ındýstrııalyq-ınnovasııalyq damý jáne týrızm basqarmasy oblys kásipkerlerimen kezdesý ótkizgende osyndaı oılar aıtylǵan edi.
Jaýap kúttirilmedi. «Mega SMART» JShS men «Shymkent jıhaz fabrıkasy» JShS, «Nur Álem» JShS, «Embavýd» JShS ókilderi bıznestiń áleýmettik jaýapkershiligi aıasynda kómek kórsetýge nıet bildirdi.
Sonyń nátıjesinde kásipkerlerdiń esebinen №1 perınataldy ortalyqqa naýqastar jatatyn bólmelerge jeke gıgıenalyq jáne ózge de zattar qoıýǵa arnalǵan 120 shkaf jetkizilip berildi.
Sondaı-aq, «Bai & R Group» JShS Shymkenttegi «Ana men bala» medısınalyq ortalyǵynyń aýlasyna oryndyqtar ornatyp berdi.
Qazir «alma pis, aýzyma tús» dep otyratyn zaman emes. Oblystyń ózinde iske asyrylatyn jumystardy Úkimettiń moınyna aýdaryp, syrttan tamashalaý aldynda aıqyn maqsaty bar, erteńi nurly halyqtyń boıyna jaraspaıdy.
Ońtústiktiń kásipkerleri bar tapqan-taıanǵanyn qoıyn-qonyshyna tyǵa beretin nıeti jaman baıaǵynyń Qarynbaıy emes. Olar elge jaqsylyq etýdiń abyroıly is ekendigin jaqsy biledi.
Baqtııar TAIJAN,
«Egemen Qazaqstan»
Ońtústik Qazaqstan oblysy