Oblystyq energetıka, turǵyn úı jáne kommýnaldyq sharýashylyǵy basqarmasy basshysynyń mindetin atqarýshy Amantaı Beknııazovtyń aıtýynsha, Energetıka mınıstrligi óńirge orta eseppen aıyna 4 000 tonna gaz bóledi. Jaz mezgilinde gazǵa suranystyń artýyna baılanysty basqarma Energetıka mınıstrligine lımıt mólsherin arttyrý týraly usynyspen shyǵýdy uıǵaryp otyr.
Paıdalanylatyn suıytylǵan gazdyń kólemin durys anyqtaý maqsatynda 2016 jyldyń basynda oblys ákimdiginde jumys toby qurylyp, onyń quramyna energetıka, turǵyn úı-kommýnaldyq sharýashylyǵy, kásipkerlik basqarmalary men tabıǵı monopolııalardy retteý agenttigi departamentiniń mamandary kirdi. Eki aı kóleminde olar barlyq gaz quıý beketterinde apta saıyn esep júrgizip keldi. Oblysta barlyǵy 60 avtogaz quıý beketi jumys isteıdi, onyń 33-i Aqtóbede, 27-si aýdandarda ornalasqan. Bir gaz quıý beketi kúnine orta eseppen 7-8 tonna gaz quıady, al aýdandardaǵy ortasha kórsetkish 3 tonnany quraıdy.
– Negizi oblysta tutynylatyn gaz kólemi 5486 tonna, onyń 3638 tonnasy oblys ortalyǵynda, 1848 tonnasy aýdan ortalyqtarynda tutynylady. Jol polısııasy basqarmasynyń málimetterine súıensek, oblysta 206 938 avtokólik bar, onyń 23 697-si gazdy paıdalanady. Bul kórsetkish aı saıyn 150-200 birlikke artyp keledi. Oblys ákiminiń tapsyrmasymen 850 vedomstvolyq kólik gazdy paıdalanady, – dep atap ótti Amantaı Beknııazov.
Maýsym aıynda oblysqa 4000 tonna gaz jetkizildi, shilde aıynda 4200 tonna otyn ákelinedi dep kútilýde. Onyń 3300 tonnasyn «SNPS-Aqtóbemunaıgaz», qalǵan 870 tonnasyn «Qazaqoıl Aqtóbe» JShS óndirgen.
Aıta keteıik, «SNPS-Aqtóbemunaınaz» kompanııasy aı saıyn 28 000 tonna, «Qazaqoıl Aqtóbe» 3000 tonna gaz óndiredi. Otyn Astana qalasy, Aqmola, Qostanaı, Qaraǵandy, Soltústik Qazaqstan, Batys Qazaqstan, Atyraý oblystaryna jetkiziledi.
Satybaldy SÁÝIRBAI,
«Egemen Qazaqstan»
Aqtóbe oblysy