Stenford qalasyndaǵy saýda ortalyǵynda kúzetshi robot tártip buzdy. Ol bir jarym jasqa endi tolatyn baldyrǵandy aldymen uryp qulatyp, artynsha aıaǵyn basyp ketipti.
Modeli Knightscope K5 robottyń bıiktigi bir jarym metrge jýyqtaıdy, salmaǵy 140 kılo. Saýda ortalyǵynda ózine tıisti aýmaqta tártip buzǵandardy tirkep otyratyn robot endi ózi tártip buzyp otyr.
Jansyz mashınadan taıaq jegen Darvın Chen esimdi baldyrǵannyń anasy: «Robot meniń ulymdy basynan uryp jiberdi, ulym edenge etpetinen qulap tústi. Sosyn sezimnen jurdaı temir ulymnyń aıaǵyn basyp ótip, ketip qaldy», deıdi.
Robot saýda ortalyǵyna bir jyl buryn jumysqa qabyldanǵan eken. Kameralarmen jáne basqa da sezgish tetiktermen jabdyqtalǵan mashına shekten tys qatty aıqaı-shý men qozǵalystardy tirkep otyrady. Knightscope K5-tiń tártipsizdiginen aýzy kúıgen ortalyq qyzmetkerleri endi saýda ortalyǵyna kelgen balalardyń qaýipsizdigi úshin bas aýyrtýda.
Arnur ASQAROV,
«Egemen Qazaqstan»