2016 jylǵy 8 tamyzda Bangkok qalasynda «EKSPO-2017» Halyqaralyq mamandandyrylǵan kórmesiniń komıssary Rápil Joshybaevtyń Taıland Koroldiginiń «EKSPO-2017» kórmesinde ulttyq seksııa Komıssary, Taılandtyń Energetıka mınıstrliginiń turaqty hatshysy Areepong Bhoochaoommen, BUU Bas hatshysynyń orynbasary – BUU Azııa men Tynyq muhıtyna arnalǵan ekonomıkalyq jáne áleýmettik komıssııasynyń Atqarýshy hatshysy Shamshad Ahtarmen, sonymen qatar, iskerlik toptarmen jáne jetekshi BAQ ókilderimen kezdesýi ótti.
Kezdesý barysynda taraptar ekijaqty ekonomıkalyq jáne energetıkalyq yntymaqtastyq máselelerin, sonymen qatar Taılandtyń «EKSPO-2017» kórmesine qatysýyn talqylady. R. Joshybaev halyqaralyq qatysýshylardy tartý boıynsha atqarylyp jatqan jumys pen «EKSPO-2017» kórmesine daıyndyq barysy týraly baıandady. О́z kezeginde, A. Bhonchaoom myrza aýqymdy sharaǵa Taılandtyń qatysýyn rastap, bul el halyqaralyq kórme aıasynda «jasyl» ekonomıka men jańartylatyn energııa salasyndaǵy eń úzdik ázirlenimderin usynýdy kózdep otyrǵanyn jetkizdi.
Sonymen qatar, qos tarap Qazaqstan men Taıland arasyndaǵy dıplomatııalyq qatynastar ornaýynyń 25 jyldyq belesinde EKSPO alańynyń joǵary deńgeıdegi ekijaqty baılanystar men qatynastarǵa qosymsha serpin beretinine senim bildirdi. Bul turǵyda, Taıland koroli otbasy múshesiniń «EKSPO-2017» kórmesindegi Taıland Ulttyq kúnin ótkizý aıasynda Astanaǵa saparyn uıymdastyrý múmkindigi de qarastyryldy.
Kezdesý qorytyndysy boıynsha taraptar Taıland seksııasynyń komıssary A. Bhonchaoomnyń bıylǵy jyldyń 19 tamyzynda Astanaǵa Taılandtyń «EKSPO-2017» kórmesine Qatysý shartyna qol qoıý maqsatynda saparyn uıymdastyrý týraly ýaǵdalastyqqa qol jetkizdi.
Búginde Taıland 2021 jylǵa deıin jańartylatyn jáne balama energııa kózderiniń jalpy tutynýdaǵy úlesin 25 paıyzǵa deıin ulǵaıtýdy kózdep otyr. Bul eldiń bıomassany damytý men paıdalanýda mol tájirıbesi bolǵandyqtan, ol bıomassany energııaǵa aınaldyrý boıynsha Azııa-Tynyq muhıty óńirindegi jetekshi oryndy saqtap qalýdy kózdep otyrǵan birden-bir memleket.
Sonymen, Taıland «EKSPO-2017» halyqaralyq kórmesine qatysýdy resmı túrde rastaǵan 96-shy memleket bolyp tur.
Láıla EDILQYZY