Ekonomıkany ártaraptandyrý, ındýstrııalandyrý baǵdarlamasyn iske asyrý baǵytynda Shymkentte birqatar óndiristik alańdar jumys istep jatyr. Kásipkerlik jáne ındýstrıaldy-ınnovasııalyq damý basqarmasynyń málimetine súıensek, osy aımaqtar 455 kásiporynnyń basyn biriktiredi. Oǵan jumsalǵan ınvestısııa 700 mlrd teńgeden asady.
Naqty statıstıkaǵa súıensek, búginde 329 kásiporyn iske qosylyp, 12 myńnan astam jańa jumys orny quryldy. Osy atalǵan óndiris oryndaryn qurý úshin 360 mlrd teńgege jýyq ınvestısııa tartyldy.
Bul jerde eki ındýstrııalyq aımaqty erekshe atap ótýge bolady. Ol – «Bozaryq» pen «Juldyz» óndiris alańy. Qala ákimdigi aýyl sharýashylyǵy ónimderin qaıta óńdeýge aıryqsha basymdyq berip otyr. Osyǵan baılanysty taǵam ónerkásibine negizdelgen «Bozaryq» ındýstrııalyq aımaǵy ashyldy. Bul óndiris alańynyń aýmaǵy – 132 ga. Munda 20 kásiporyn ornalasýǵa tıis. Qazirgi tańda «Altaı fýd» óndiris orny ǵana qurylysyn aıaqtap, ónim shyǵaryp jatyr. Kásiporyn tátti marmeladtar óndiredi. Bıznes jobany iske asyrýǵa ınvestorlar 500 mln teńge qarjy quıdy.
Al «Juldyz» ındýstrııalyq aımaǵy qurylys ónimderin shyǵarýǵa negizdelgen. О́ndiris alańy 306 gektar jerge jaıǵasqan. Josparǵa sáıkes munda 72 kásiporyn boı kóterýge tıis. Osy maqsatqa oraı 235 mlrd teńge ınvestısııa tartý kózdelgen. О́ndiris aımaǵy tolyq qýatyna kóshse, 4 635 adam jumyspen qamtylady. Al búgingi tańda munda 8 kásiporyn jumys istep tur.
Olardyń úsheýi byltyr iske qosyldy. Bul óndirister – avtoklavty gazdy beton shyǵaratyn «Sauran Brikcs», PVH qubyrlaryn óndiretin «Polıtreıd Kazahstan» jáne temirbeton buıymdaryn jasaıtyn «Altyn Land» JShS.
Qalada qazir qurylys salasy qarqyn alyp keledi. Paıdalanýǵa beriletin kópqabatty turǵyn úıler jyldan jylǵa artyp otyr. Odan bólek áleýmettik nysandardyń qurylysy da kóptep salynyp jatyr. Mine, osy ǵımarattardyń bárine qurylys materıaldary qajet. Al qurylys kompanııalarynyń suranysyn tolyq qanaǵattandyrý otandyq qurylys ónimderin kóbeıtý arqyly júzege asatyny belgili. Sondyqtan da jergilikti atqarýshy bılik qurylys ındýstrııasyn órkendetýge erekshe mán berip otyr.
«Juldyz» ındýstrııalyq aımaǵynda endi iske qosylatyn kásiporyndar áli kóp. Sol sebepti qurylys zattaryn óndirý jaǵynan Shymkent keleshekte kósh bastaıdy degen úmit bar. Sondaı-aq qala ákimdigi aýyl sharýashylyǵy ónimderin qaıta óńdeý men tamaq ónerkásibine aıryqsha den qoıa bastady. Oǵan osy saladaǵy keıingi jyldary jetken jetistikter kýá. Sonyń bir mysaly «Bozaryq» ındýstrııalyq aımaǵynda qolǵa alynyp jatqan ınvestısııalyq jobalar bolsa, ekinshiden elimizdegi eń iri jylyjaı keshenderiniń biri de osy megapolıste ashyldy.
Deı turǵanmen atalǵan óndiris alańdarynda búginde tańda sheshimin kútken máseleler barshylyq eken. Ol jóninde ındýstrııalyq aımaqtarǵa jaýapty mekeme basshysy Marat Seıdalıev aıtyp berdi. «Bozaryqta» qosalqy stansa salynyp jatyr. Onyń qurylysy bitpeı kásiporyndar iske qosyla almaıdy. Sebebi elektr qýaty jetpeıdi. Al qosalqy stansa qurylysy qashan aıaqtalatyny belgisiz. Qazir jer telimin rásimdeý jumystary júrip jatyr. Odan keıin jobasy jasalyp, memlekettik saraptamadan ótýge tıis. Birneshe gaz taratý qondyrǵylary da qoldy bolyp ketti. Sýǵa kelsek, qazir merdiger kompanııa men energetıkaǵa jaýapty basqarma arasynda sot bolyp jatyr. Degenmen ındýstrıaldy aımaqta qurylys jumystary toqtaǵan joq. Oǵan qajetti 100 kVt elektr qýaty jetkilikti. О́ndiriske 1000 kVt-dan joǵary elektr energııasy qajet. Al bul qýatty beretin tek qosalqy stansa ǵana. «Juldyz» ındýstrııalyq aımaǵynda da jaryq tapshy. Ol elektr energııasyn janyndaǵy «Ońtústik» arnaıy ekonomıkalyq aımaǵynan alyp otyr. «Juldyzdy» tolyq elektr qýatymen qamtamasyz etý úshin ózindegi 80 mVt qosalqy stansasyn jańǵyrtyp, qýattylyǵyn 160 mVt-ǵa kóterý qajet. Osy maqsatty iske asyrý úshin jańǵyrtý jobasy jasaldy. Ol bıyl shildede memlekettik saraptamadan ótip bitýge tıis», deıdi M.Seıdalıev.
ShYMKENT