Turaqtylyq kúshi – birlikte. Eshqandaı dáleldeýdi qajet etpeıtin aksıoma bul. «Bólingendi bóri jeıtinin», «saýsaq birikpese, ıne ilikpeıtinin» soltústikqazaqstandyqtar da jaqsy túsinedi. Elbasynyń ultaralyq tatýlyqqa, konfessııaaralyq kelisimge negizdelgen saıasatyn jan-tánimen qoldaıtyndyqtary sondyqtan. Sabaqtastyq dástúrleri óz jarasymyn taýyp, keleshek urpaqqa úlgi-ónege bolsyn degen tilekte. Sol sebepti tálim alar taǵylymdardy is júzinde ornyqtyrý sharalaryna belsene qatysyp keledi.
О́ńirde turatyn túrli etnos ókilderiniń qatysýymen ótken «Salt-dástúr» etnomádenı festıvali barysynda eldegi tynyshtyq pen ózara kelisim basty taqyryp arqaýyna aınalyp, qazaqstandyq jarqyn jol ustanymdary jan-jaqty pash etildi. Ulttyq naqyshta kıingen adamdar Táýelsizdik stellasy alańyna jınalyp, mereke ajaryn asha tústi. Bir-birlerimen emen-jarqyn amandasyp, quttyqtaý sózderi bolashaǵymyz baıandy bolǵaı degen aqjarma tilekterge ulasyp jatty. Osy bir ustyn tabıǵı órilip, ádemi úılesim taýyp, «pa, shirkin!» degen erekshe lepti ańǵartqandaı.
Oblystyq Qazaqstan halqy Assambleıasy hatshylyǵynyń meńgerýshisi Naıl Salımovtyń jurtshylyq aldynda sóılegen sózi jarqyn shyqty. Ol festıval Táýelsizdigimizdiń 25 jyldyq mereıtoıy qarsańynda ótip jatqanyn, turǵyndardy biriktirýshilik, ortaq maqsatqa jumyldyrýshylyq mańyzyn atap kórsetti. Osydan shırek ǵasyr buryn oblysta 5 qana etnomádenı birlestik qurylsa, qazir olardyń sany 25-ke jetken. Jergilikti jerlerdegi 130-ǵa tarta ulttyq birlestikter óskeleń urpaq boıyna qazaqstandyq patrıotızmniń jaqsy úlgilerin qalyptastyrýǵa óz úlesin qosyp keledi, dedi N.Salımov.
Sándik-qoldanbaly qolóner kórmesin tamashalaýshylar nazaryna ulttyq kıimder, saz aspaptary, qysh ydystar, zerli áshekeı buıymdar, teriden, kıizden jasalǵan ónimder usynylyp, kóz jaýyn alatyn zattar has sheberlerdiń qolynan shyqqanyn birden aıǵaqtaıdy. Aqjar aýdanynan arnaıy kelgen Mádıqajynyń otbasy dombyra, qobyz, adyrna, astaý jasaýmen kópten beri aınalysady eken.
Oblystyq «Mereıli otbasy» baıqaýynyń júldegeri sanalady. Byltyr «Jumyspen qamtýdyń jol kartasy-2020» baǵdarlamasy sheńberinde alǵan jeńildikti nesıege sheteldik stanok alyp, isin damyta túsken.
– Men metall, aǵash qaldyqtarynan, plastıkalyq zattardan qolóner ónimderin jasaýdyń qyr-syryn balalarǵa úıretý maqsatymen úıirme ashtym. Talantty da talapty búldirshinderdiń qolónerge degen qyzyǵýshylyǵyn arttyra otyryp, túrli konkýrstarǵa úzbeı qatysyp júrmiz, – deıdi Tımırıazev aýdanynyń namysyn qorǵaı kelgen, 37 jyl jumys tájirıbesi bar ustaz. Onyń shákirtteri jasaǵan sý asty álemin beıneleıtin kolleksııa jıyntyǵy kópshilikti qaıran qaldyrdy. Sol sııaqty, Letovochnoe aýylynyń turǵyny Nadejda Maslova usynǵan buıymdar men órnekter orys halqynyń ulttyq erekshelikterin aıtqyzbaı tanytady. Onyń bastamasymen qazaq, orys jáne nemis tilderinde balalardyń óleńder jınaǵy qurastyrylypty.
Aqqaıyń aýdanynyń «Shańyraq» etnomádenı birlestigi «Besikke bóleý» sahnalyq qoıylymyn usynyp, búginde umytyla bastaǵan dástúrimizdi ár qyrynan pash etti. «Birlik» uıymy Mersıshor meıramyn qaz-qalpynda beıneleýge tyrysty. Moldovandardyń bul merekesi erteden toılanatyn kórinedi. Kóktem saǵyntyp jetkende bir-birin quttyqtap, syılyq berý dástúri qalyptasqan. Naýryzǵa uqsas jaqtary kóp. Tımırıazevtikterdiń erkek pen áıeldiń ózara syılasymdylyǵyn ashyp kórsetetin kórinisi ózgelerge úlgi etildi. Basqa da ulttyq salt-dástúrler men ádet-ǵuryptar sahnalanyp, tálim-tárbıelik maǵynalary barynsha ashyp kórsetildi.
Bas júldeni Ǵ.Músirepov aýdanynyń ókilderi jeńip aldy. Sondaı-aq, baǵdarlamaǵa engen 14 ulttyq salt-dástúrler atalymdary boıynsha júldegerler belgili boldy.
О́mir ESQALI,
«Egemen Qazaqstan»
Soltústik Qazaqstan oblysy
Sýretti túsirgen
Talǵat TÁNIBAEV