Erteń, ıaǵnı 23 tamyz kúni Abaı Qunanbaıulynyń týǵan kúni. Osyǵan baılanysty uly aqynnyń týǵan kúnine oraı Abaı qoryq-mýzeıinde osy zerde ordasynda jınaqtalǵan týyndylar negizinde «Shyńǵystaý» sýret galereıasy ashyldy.
Shyńǵystaý – qazaq halqynyń uly perzentteri Abaı Qunanbaıulynyń, Shákárim Qudaıberdiulynyń, Muhtar Áýezovtiń týǵan mekeni. Evrazııanyń kindik tusynda jatqan Shyńǵystaý jerinde úsh alyptyń dúnıege kelip, sóz ónerin ásemdik bıigine kóterýi – adamzat tarıhynda sırek kezdesetin qubylys.
Qasıetti Shyńǵystaý óńiriniń tabıǵaty men tarıhı jerleri Abaı qoryq-murajaıy qorynda jınaqtalǵan jergilikti qylqalam sheberleriniń týyndylary arqyly kórsetiledi. Sýret-galereıasynda belgili óner ıeleri M.Álıakparov, M.Belıaev, Ǵ.Makarov, N.О́tepbaev T.Baıǵalıev, T.Tatıev jáne taǵy basqa sýretshilerdiń 100-den astam týyndylary qoıylǵan.
Abaı mýzeıine kelýshilerdiń, ásirese halqymyzdyń sýret ónerindegi maqtanyshy Ábilhan Qasteevtiń jaýhar týyndylary erekshe qyzýshylyǵyn týdyrady dep senemiz. Áıgili qylqalam sheberiniń mýzeı qorynda 12 týyndysy saqtalǵan bolsa, sonyń biri – «Jas Abaı» sýreti de kelýshilerdiń kózaıymyna aınalady.
Abaıdyń «Jıdebaı-Bórili» memlekettik qoryq-murajaıynyń baspasóz qyzmeti
Sýret galereıasynyń bir ereksheligi – qylqalam sheberleriniń týyndylary mýzeıdegi Abaı ómiri men shyǵarmashylyǵyn pash etetin bólimderdiń mazmunyn tereńirek asha túsýge kómektesedi. Máselen, «Jaz» zalynyń mańdaı aldyndaǵy qylqalam sheberleriniń týyndylary Shyńǵystaý óńiriniń tabıǵatyn aldyńyzǵa jaıyp salyp, «Úsh qaınar bulaq» ekspozısııasyndaǵy sýretter uly aqyn shyǵarmalarynyń tereń tamyrlarymen úndesip ketetindeı.
Dastan KENJALIN
Foto: Jıdebaı-Bórili» memlekettik qoryq-murajaıy