Senat Tóraǵasy Qasym-Jomart Toqaev Pagýosh ǵylym jáne halyqaralyq ister jónindegi ǵalymdar qozǵalysynyń prezıdenti, belgili dıplomat, BUU Bas hatshysynyń Qarýsyzdaný jónindegi burynǵy orynbasary Djaıantha Dhanapalany qabyldady, dep habarlady Senattyń baspasóz qyzmeti.
1957 jyly qurylǵan Pagýosh qozǵalysy beıbitshilik, qarýsyzdaný, qaýipsizdik jáne jahandyq aýqymdaǵy ǵylymı yntymaqtastyqty jaqtaıtyn ǵalymdardy, saıasatkerlerdi jáne qoǵam qaıratkerlerin biriktiredi. Qozǵalys Iаdrolyq qarýdy atmosferada, ǵarysh keńistiginde jáne sý astynda synaýǵa tyıym salý týraly shart, Iаdrolyq qarýdy taratpaý týraly shart, Zymyrandarǵa qarsy qorǵanys júıesin shekteý týraly shart, Qarýdyń bıologııalyq jáne hımııalyq túrlerine tyıym salý týraly konvensııa, Eýropadaǵy jaı qarýlar týraly shart, taǵy basqa negizgi kóptarapty kelisimderdi ázirleýde jáne qabyldaýda mańyzdy ról atqardy. 1995 jyly Uıym Nobeldiń Beıbitshilik salasyndaǵy syılyǵyna ıe boldy.
Q.Toqaevtyń aıtýynsha, Qazaqstan Pagýosh qozǵalysynyń ıdeıasy men qundylyqtaryn jaqtaıdy, sondaı-aq qozǵalystyń qarýsyzdaný jáne qaýipsizdik salasyndaǵy halyqaralyq kelisimderdi ázirleýdegi jáne qabyldaýdaǵy rólin joǵary baǵalaıdy.
Kezdesý barysynda Qazaqstannyń Pagýosh qozǵalysynyń 2017 jyly bolatyn mereıtoılyq kezdesýin ótkizý múmkindigi qaraldy. Qozǵalys músheleriniń Astanada sondaı kezdesý ótkizý týraly tilek bildirýi Semeı ıadrolyq polıgonyn máńgilikke jaýyp, adamzatty ıadrolyq soǵys qaýpinen qutqarý isine naqty úles qosqan, álemde qýaty jaǵynan tórtinshi oryn alatyn ıadrolyq áleýetten bas tartqan bizdiń elimizdiń jáne onyń basshysy Prezıdent Nursultan Nazarbaevtyń halyqaralyq bedeline baılanysty bolyp otyr.
Q.Toqaev 29 tamyzda bolǵan «Iаdrolyq qarýsyz álem qurý» halyqaralyq konferensııasyna qatysqany jáne ondaǵy mazmundy baıandamasyna oraı meımanǵa rızashylyq bildirdi.