Kúrshimge joly túsken jan Buqtyrma aıdynyna kelgende paromǵa otyrady. Qos jaǵalaýdaǵy qatynasty sońǵy jyldary kúrdeli jóndeýden ótken «Kúrshim» men «Ertis» paromdary jalǵap tur. Bir paromǵa 70-ke jýyq kólik syıady. 200 tonnaǵa deıin júk kótere alatyn parom palýbasy bir sát bosaǵan emes. Kúrshim men Qaljyr arasyndaǵy jol ortasha jóndeýden ótkeli beri Zaısan jaǵynan da qatynaýshylar qatary artty. Parom arqyly ótip júrgen zaısandyqtar joldyń bul baǵyty birshama qysqa ári qolaıly ekenin aıtady.
Kólikterdi toltyra tıep alǵan soń paromdar zákirdi kóterip, kókshýlan sýdy qaq jara júze bastaıdy. Jolaýshylar da kólikterinen shyǵyp, aıdyndy tamashalaıdy, paromnyń ekinshi qabatyna kóterilip, dámhanadan shaı ishedi, telefondaryna sýretke túsedi. Mine, osy sátte kúlli jolaýshylardyń nazary paromdy jaǵalaı ushqan qarlyǵashtarǵa aýady. Endi bir sátte qustardyń paromdaǵy uıalaryn da baıqaısyz. Aýzyn asha shúpirlegen balapandarǵa azyq tasyǵan qarlyǵashtar bir sát te tolastamaıdy. Osy bir sý kóligine jylylyq syılaǵan qarlyǵashtar paromǵa jylda uıa salady eken. On bes jylǵa jýyq ýaqyt boıy Qyzyltý ótkeliniń meńgerýshisi bolyp eńbek etip kele jatqan Baqytbek Nurpeıisov qarlyǵashtarǵa parom jolaýshylarynyń eshqaısysy tımeıtinin, kerisinshe, qustarǵa qyzyǵa qarap, qolda bar azyǵyn shashýǵa tyrysatynyn aıtady.
– Men paromda 2004 jyldan beri jumys isteımin. Qarlyǵashtar sol kezde de birdi-ekili uıa salatyn. Qazir ár paromda on shaqty uıadan bar. Iаǵnı, eki paromda jıyrmaǵa jýyq uıa bar. Bizdiń qarlyǵashtarǵa baýyr basyp qalǵanymyz sonshalyq, jyly jaqqa ketken soń kememizdegi qustar bazarynyń tarqaǵanyna birazǵa deıin úırene almaı júremiz, – deıdi Baqytbek Nurpeıisov.
Rasynda, paromǵa otyrǵan saıyn ásem de áıdik aıdynmen birge sýsyldaǵan qanatymen sátke tynym tappaıtyn qarlyǵashqa qarap kóńilińiz kóteriledi.
Dýman ANASh,
«Egemen Qazaqstan»
Shyǵys Qazaqstan oblysy,
Kúrshim aýdany
Sýretterdi túsirgen
Alekseı MAZNISIN