Fýtboldan Qazaqstan ulttyq quramasynyń burnaǵy kúni Bishkekte Qyrǵyzstannyń bas komandasymen ótkizgen joldastyq kezdesýinde 0:2 esebimen utylyp qalýy, jumsartyp aıtqannyń ózinde, óte qolaısyz oqıǵa boldy. Bul eki jamaǵattyń buǵan deıingi ózara jeti ret kezdesýinde bizdiń aıaqdop sheberleriniń udaıy des bermeı kelgeni bir sebep shyǵar.
Sóıtip, osy qarsylasymen ushyrasýlarda 5 ret jeńiske jetip, 2 ret qana teń oınaǵan, eshqashan jeńilip kórmegen dástúrimizge bir-aq sátte syzat tústi. Qurama bas jattyqtyrýshysy laýazymyna jaqynda ǵana resmı túrde bekitilgen Talǵat Baısýfınovke de bul jeńilis onshalyqty abyroı ápere qoımasa kerek.
Eger matchta Qazaqstan quramasy joǵary dárejeli oıyn kórsete alǵan bolsa, áńgime basqa. Biraq olaı bolmady. Alań ıeleri kezdesýdiń basynan onyń tizginin qoldaryna ustady. Olar birinshi taımdy qonaqtar qaqpasyn udaıy qaraýylǵa alyp, shabýyldaýmen ótkizdi. Sonyń nátıjesinde oıynnyń osy bóliginde óz basymdyqtaryn golǵa aınaldyra bildi. 43-mınýtta buryshtamadan berilgen dopty qorǵaýshy Valerıı Kıchın alystan uryp túsirdi.
Kezdesýdiń ekinshi taımynda Qazaqstan quramasynyń bas bapkeri alańdaǵy birqatar oıynshylardy almastyrdy. Osydan keıin jerlesterimiz birshama batyl oınaı bastady. Biraq budan túıindi qorytyndy shyǵarýǵa qaýqarsyzdyq tanytty. Munyń esesine qyrǵyzdar taǵy da shalttyq kórsetip ketti. Osylaısha 82-mınýtta Mırlan Mýrzaev esepti 2:0-ge jetkizdi.
Qazaqstan quramasy kelesi oıynyn 4 qyrkúıek kúni Astanada ótkizedi. Ol osy kúni ótetin 2018 jylǵy álem chempıonaty irikteý týrnıriniń birinshi oıynynda Polsha komandasyn qabyldaıdy.
Damır QOJAMQUL