Oqyrman
...úmit artady
Kolledj oqýshylary kóbeıýde
Kásiptik bilim beretin bizdiń kolledjge oqýǵa tilek bildirýshiler qatary jyl ótken saıyn kóbeıip keledi. Aldaǵy oqý jylyna kásiptik baǵdar jóninde qam-qaraket jasap júrgen pedagogtar toǵyz aýylda boldy. Munyń bir nátıjesi – toqsanǵa taıaý ul men qyz osynda oqýǵa ótinish berip, bolashaq mamandyqty kolledjde alýǵa tilek bildirdi. Olardyń arasynda orta mektepti bıyl bitirgender de bar.
Mehanızator, shofer, sondaı-aq toǵyzynshy synyp bazasynda tehnık-mehanık, býhgalter-ekonomıst mamandyqtaryna qyzyǵýshylar da az emes. Agrokolledjdegi qazir bilim men tárbıe alyp jatqan oqýshylardyń seksen ekisi mehanızator mamandyǵy boıynsha oqyp, olardyń jıyrmasy kolledjdi bıyl aıaqtap otyr. Osy mamandyq boıynsha ótken jyly bitirgen jıyrma eki shákirttiń on úshi jumysqa ornalasty. Al toǵyzy áskerge shaqyrylyp azamattyq paryzdaryn ótep júr. Bolashaq jastardiki desek, osyndaı shákirtterge úmit artamyz.
Baqytjan QOSPAEV,
Aqjaıyq aýdandyq agrarlyq-tehnıkalyq
kolledjdiń dırektory
Batys Qazaqstan oblysy
...dabyl qaǵady
Shıpajaı qashan qalpyna keledi?
Taldyqorǵan qalasynan 110 shaqyrymdaı qashyqtyqta ornalasqan «Qapal-Arasan» shıpajaıy kezinde bir mezgilde 500-den asa tynyǵýshy qabyldaıtyn. Keıinnen shıpajaı ǵımaraty talan-tarajǵa túsip ustaǵannyń qolynda, tistegenniń aýzynda ketken. Qudaı ońdap, janashyr azamattardyń arqasynda 1992 jyly salynǵan 150 oryndyq shıpajaı ǵana saqtalyp qalǵan. 2000 jyldardan bastap ǵımarattardy qalpyna keltirý, kúrdeli jóndeý jumystary júrgizildi. 2002 jyldan shıpajaı demalýshylardy qabyldaı bastady.
Aıta keteıik, Arasan sýy quramy jaǵynan aty belgili shıpajaılardyń sýynan bir mysqal kem emes. Emge daýa turǵysynan alǵanda Vengrııa, Italııa, Fransııa sekildi álemge belgili elderdiń ataqty shıpajaılarynan asyp túspese, kem soqpaıdy. Endi, mine, shıpajaı taǵy qańyrap bos qaldy.
Baǵdarly baǵdarlamalarda adamnyń densaýlyǵyna zor yqpal etetin demalys oryndaryna mán berilip jatsa da «Qapal-Arasan» shıpajaıyna kezek tımeı tur. Bul saýyqtyrý orny jumys istep turǵanda jumysshylardyń basym bóligi jergilikti turǵyndardan bolǵan. Búginde aýyl halqy da demalys orny qaıta ashylsa nur ústine nur bolar edi deıdi. Qazaqstandaǵy ejelgi em ornynyń biri sanalǵan shıpajaı qaıta qalpyna keltirilse eken.
Áset DALBAEV
Almaty oblysy,
Aqsý aýdany,
Arasan aýyly
...úlgi tutady
Qulpynaı ósire bilesiz be?
Búginde kásip ashamyn degen azamatqa Úkimet múmkindik berip, bıznesti damytýdyń jol kartasy boıynsha elimizde jas kásipkerlerdiń sany artyp keledi. Sondaı azamattyń biri – jas kásipker Nurlan Apýshev sharýashylyǵyn bastap, Astanadan 60 shaqyrym jerdegi Shortandy aýdanynyń Damsa aýylynda qulpynaı egýdi qolǵa aldy. Tamshylatyp sýarý ádisimen 1 gektar jerine 50 myń qulpynaı kóshetin otyrǵyzyp, ár apta saıyn 100 keli ónim alyp otyr.
«Hımııalyq preparatsyz tabıǵı ónimge degen suranys ta arta bastady. Egin alqabynda 20-ǵa jýyq adam eńbek etip jatyr. Ár túp qulpynaı jıdegi 1-2 keli ónim beredi, jazǵy aýmaqta 100 tonnaǵa deıin ónim jınaımyz dep josparlap otyrmyz. Jańbyrly jazda ósim bitik shyǵady jáne qulpynaımen qatar basqa da jıdekterdiń túrin kóbirek ósirýdi qolǵa alsaq deımiz», deıdi sharýa qojalyǵynyń basshysy N.Apýshev.
Syrttan keletin qospasy bar jemisten góri ózimizde óndirilgen ónimdi nege tutynbasqa? О́zgeniń ónimine júgirgenshe, ózimizdikin órge súıreıik, shetelge eksportqa shyǵýyna jaǵdaı jasaıyq.
Aıman MUQYShOVA
Aqmola oblysy,
Shortandy aýdany,
Damsa aýyly
...batasyn beredi
Jas otbasyna aq tilek
Shetpe aýylyndaǵy Jastar ortalyǵynda «Aq oramal» aksııasy aıasynda «Jas januıaǵa aq tilek» atty is-shara ótkizildi. Tárbıelik mańyzǵa ıe sharany ortalyq basshysy A.Qonarbaev júrgizdi. «Jastar ortalyǵy Elbasynyń tapsyrmasyna oraı qolǵa alynǵan respýblıkalyq dárejedegi sharanyń tárbıelik mańyzyna mán berip otyr. Qazirgi tańda jastar tárbıesine, onyń ishinde jas shańyraq kótergen otbasylaryna qatysty kúrmeýi qıyn máseleler kóbeıip keledi. Onyń basty sebebi – otbasylyq qundylyqtardyń tómendeýi. Búgingi sharada jastar otbasy tárbıesi jáne aq oramaldyń qasıeti jaıynda tereńirek málimet alady degen oıdamyn», – dedi A.Qonarbaev.
Sharada jastarǵa aq oramal týraly ánder aıtylyp, óleńder oqyldy. T.Ahmetova degen ájeı jas shańyraq kótergen Almas pen Jannurǵa aq batasyn berip, aq oramalyn taqty.
Dına О́TEPBERGENOVA,
Jastar ortalyǵynyń mamany
Mańǵystaý oblysy,
Mańǵystaý aýdany
...jańalyǵyn jetkizedi
Sýret-vıdeo stýdııasy ashyldy
Qyzylordalyq jas kásipker Nurjan Ábsamatov memlekettik qoldaý aıasynda óziniń kásibı sýret-vıdeo stýdııasyn ashý ıdeıasyn sátti júzege asyrdy. Kásipkerdiń ıdeıasyn Damý qory qoldap, 7 mln teńge kólemindegi nesıe qarajatyna qajetti qural-jabdyqtar satyp aldy. Alǵashqy mamandyǵy boıynsha Nurjan Ábsamatov qarjyger bolsa da, mamandyǵy boıynsha jumys jasamaǵan. Stýdenttik jyldary ol sýret-vıdeo salonyna fotograf-dızaıner bolyp jumysqa turǵan. Salonda eki jyl qyzmet atqarǵan Nurjan óziniń tek osy salany damytqysy keletinin túsindi. Sondyqtan da T.Júrgenov atyndaǵy Qazaq ulttyq óner akademııasyna oqýǵa túsip, prodıýser mamandyǵy boıynsha dıplom aldy.
– Oqýymdy aıaqtaǵan soń sýret jáne vıdeo salasynda jınaǵan tájirıbeme súıenip, bıznes bastaýǵa bel býdym. Stýdııamdy ashyp ta úlgerdim jáne búginde qyzylordalyqtarǵa tıimdi baǵada kásibı qyzmet kórsetýdemiz, – deıdi N.Ábsamatov.
Bıznesti qalaı júrgizý jáne qarjyny tıimdi basqarýdy úırený úshin kásipker «Stýdenttik jastardyń kásipkerlik bastamasyn qoldaý» baǵdarlamasy aıasynda kásipkerlik kýrsyn oqydy. Ol qazir 6 azamatty turaqty jumyspen qamtyp otyr.
Nıet BUIYRSYN
Qyzylorda