Májilis Tóraǵasy Nurlan Nyǵmatýlınniń tóraǵalyǵymen palatanyń bıýro otyrysy ótip, aldaǵy jalpy otyrystyń kún tártibi naqtylandy, dep habarlady Májilistiń baspasóz qyzmeti.
Halyq qalaýlylary nazaryna halyqaralyq ǵylymı-tehnıkalyq ortalyqtyń qyzmetin jalǵastyrý týraly kelisimdi ratıfıkasııalaýǵa qatysty zań jobasy usynylady.
Qazirgi ýaqytta atalǵan ortalyqqa 38 memleket múshe. Qazaqstan múshelikke engen 21 jyldyń ishinde ortalyq 200-den astam qazaqstandyq jobalardy qarjylandyrǵan. Oǵan 5000-nan astam otandyq ǵalym tartylǵan.
Sonymen birge, osy kúni Tájikstanmen Strategııalyq áriptestik týraly shartty ratıfıkasııalaýǵa baılanysty zań jobasy talqylanbaq.
Jalpy otyrysta Májilis depýtattary 1995 jylǵy 23 jeltoqsandaǵy Reseımen Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly úkimetaralyq kelisimge ózgerister engizý týraly hattamany ratıfıkasııalaıtyn zań jobasyn jumysqa qabyldaıdy.
Taǵy bir atap óterligi – bıýro otyrysynda Parlament Májilisi Tóraǵasynyń janynan Depýtattyq ádep keńesin qurý týraly qaýly qabyldandy.