Astanadaǵy Ońtústik Qazaqstan oblysy kúnderiniń aıasynda Ulttyq mýzeı, Ulttyq akademııalyq kitaphana, Jastar teatry syndy iri mádenı nysandarda birqatar mádenı sharalar uıymdastyryldy.
Eń aldymen Ulttyq mýzeıde Ońtústik Qazaqstan oblysy Beıneleý óneri mýzeıiniń «Shyraıly Ońtústik shejiresi» atty kórmesi ashyldy. El tarıhyndaǵy eleýli kezeńderdi qamtıtyn kórmege kartınalar, grafıka jáne gobelender qoıyldy. Handyq dáýir, 1916 jylǵy Ult azattyq kóterilis, óndiristik damý, aýyl sharýashylyǵy eńbekkerleri beınelegen týyndylarda Qazaqstannyń grafıkasyn qalyptastyrǵan sýretshiler men ońtústik ólkesinen shyqqan talantty sýretshilerdiń qoltańbalary bar. Onyń ishinde Evgenıı Sıdorkınniń «Qyz Jibek», «Aqsaqal», Nıkolaı Gaevtiń «Aqyn O.Súleımenov» grafıkalary, ońtústikte alǵashqy kásipqoı gobelenniń negizin qalaǵan Qurasbek Tynybekovtyń «Domalaq ana», «Týǵan ólke», B.О́tepovtyń «Báıterek» syndy gobelenderi, alǵashqy kásipqoı sýretshiler Aınabek Ospanovtyń «Soǵys ardageri», Ánýarbek Aıdosovtyń «Qudaǵı júzik» syndy týyndylary kópshilik nazaryna usynyldy. Jalpy, kórmege 20-dan asa avtordyń halqymyzdyń rýhanı qundylyqtaryn, keń baıtaq ólkeniń kórkem jerlerin beınelegen alýan túrli taqyryptaǵy týyndylary qoıyldy.
Ulttyq akademııalyq kitaphanadaǵy mádenı shara barysynda astanalyq oqyrmandar ońtústikten kelgen bir top qalamgerlermen kezdesti. Kezdesýdi belgili jazýshy, Halyqaralyq «Alash» ádebı syılyǵynyń ıegeri Marhabat Baıǵut júrgizdi. Alǵashqy sóz kezegin alǵan Ońtústik Qazaqstan oblysy ákiminiń orynbasary Ulasbek Sádibekov áńgimesine oblystyń tynys-tirshiligin, mádenı jańalyqtaryn arqaý etti. Ákimniń orynbasary Ulttyq akademııalyq kitaphananyń dırektory Úmithan Muńalbekovaǵa óńir týraly jańadan shyqqan kitaptardy syıǵa tartty.
Keshtiń kórigin Ońtústikten kelgen elimizge belgili aqyndar qyzdyrdy. Narmahan Begaly, Hanbıbi Esenqaraqyzy, Baqytjan Aldııar, Serik Seıitman qatarly respýblıka kóleminde tanymal aqyndar ózegin jaryp shyqqan óleńderin oqyp, kezdesýdiń mán-mańyzyn arttyrdy. Aıta ketý kerek, kezdesý sońy «Otyrar» ǵylymı ámbebap kitaphanasynyń «Ulysymnyń uıytqysy – Ońtústik» atty kitap kórmesine ulasty.
Al, keshke qaraı Jastar teatrynda Ońtústik Qazaqstan oblysy J.Shanın atyndaǵy akademııalyq qazaq drama teatry ártisteri jazýshy Sábıt Dosanovtyń «Tozaq sheńberi» tragedııasyn sahnalady. Sıýjetin Jeltoqsan oqıǵasynan alǵan tragedııada qazaqtyń namysty, jigerli ul-qyzdarynyń beınesi somdaldy. «Tozaq sheńberiniń» qoıýshy rejısseri Sh.Aıtmatov atyndaǵy halyqaralyq syılyqtyń ıegeri Qýandyq Qasymov, al, qoıýshy sýretshisi QR Mádenıet qaıratkeri Qaltóre Jumaqulov. Teatr foesinde jýrnalısterdiń saýaldaryna jaýap bergen Ońtústik Qazaqstan oblysy Mádenıet basqarmasynyń basshysy Nurbolat Ahmetjanov óńirdiń óte jaqsy daıyndyqpen kelgenin baıandady. «Astanadaǵy Ońtústik Qazaqstannyń kúnderin ótkizýge kóp daıyndaldyq. Túrli salany qamtýdy maqsat tuttyq. Túrli sala boıynsha 300-den asa adam keldi osynda. Mysaly búgin sýretshiler kórmesi, aqyn-jazýshylarmen kezdesýler ótip, teatrlarda spektaklder qoıylýda. Sondaı-aq, «Ońtústik-fılm» kınostýdııasy túsirgen birqatar fılmder kórsetildi. «Ońtústik-fılmniń» mýltfılmderi erteń astananyń jas turǵyndaryna usynylady. Jáne mádenı sharalardy qorytyndylaıtyn Gala-konsert te erteń Kongress-Hol saraıynda ótpek»-dedi ol.
Aıgúl SEIILOVA
FOTO: Orynbaı BALMURAT