Memlekettik qyzmet isteri jáne sybaılas jemqorlyqqa qarsy is-qımyl agenttiginde onyń tóraǵa orynbasary A.Shaımovanyń qatysýymen ótken brıfıngte «100 naqty qadam» – Ult josparyndaǵy «Kásibı memlekettik apparat qurý» jaıy jan-jaqty sóz etildi.
Agenttik tóraǵasynyń orynbasary barlyq mańyzdy da qajetti aqparattardy der kezinde jetkizý jaıyn erekshe atady. О́ıtkeni, memlekettik qyzmetke degen qyzyǵýshylyq áli de tolastamaı keledi. Onyń basty dáleli – agenttiktiń saıtyna kún saıyn memlekettik qyzmetke qatysty zańnamaǵa túsinik berýdi suraǵan ondaǵan saýaldar kelip túsýde. Ásirese, memlekettik qyzmetke ornalasý tártibi, laýazym satysymen joǵarylaý, jumys ótiliniń eseptelýi, biliktilik talaptarǵa sáıkestigi sııaqty máseleler óte qyzyqtyryp otyr. Sondyqtan da, agenttik júıeli túrde jan-jaqty aqparat berip turý úshin jańadan taǵaıyndalǵan Memlekettik qyzmet isteri agenttiginiń resmı ókili Asan Qalıahmetov pen Sybaılas jemqorlyqqa qarsy is-qımyl ulttyq bıýrosynyń resmı ókili Aqjan Yrysaldınovty arnaıy tanystyrdy.
A.Shaımova árkim óziniń jumys ýaqytyn tıimdi paıdalansa, jumystan erterek ketýge múmkindik alatynyn da ortaǵa saldy. Ol úshin árbir memlekettik qyzmetshi ózin ózi tárbıeleý arqyly jumys ýaqytyn tıimdi paıdalanýy kerek. Tipti, memlekettik qyzmetshilerdi oqytý barysynda osyndaı ózderin ishten tárbıeleý tetigi engizileri de atalmaı qalmady. Agenttik tóraǵasy orynbasarynyń paıymynsha, barlyq másele tek baqylaýǵa ǵana qatysty emes.
«Búgingi tańda barlyq memlekettik organdardaǵy júıeli óńdeý ortasha eseppen 1 saǵat 19 mınýtty quraǵan. Sondyqtan, agenttik tek baqylaý júrgizý jolymen ǵana emes, memqyzmetshilerdiń ishki tártibin ózderi ornatýyna múmkindik berý arqyly sheshýdi usynyp otyrmyz», dedi Aıgúl Amanbaıqyzy.
Asqar TURAPBAIULY,
«Egemen Qazaqstan»