«Egemen Qazaqstan» gazetiniń 8 qazan kúngi sanynda Aleksandr Tasbolatovtyń «Abaılańyz... aıyqtyrǵysh!» taqyrybymen materıal jarııalanǵan bolatyn. Onda memleket tarapynan ishimdikke qarsy kúres júrgizýdiń túrli amal-áreketteri tıisti zańnamalyq negizde jasalyp jatqanymen, «baıaǵy jartas – bir jartas» kúıinde qalyp otyrǵany jaıynda jazylǵan edi.
Endi, mine, osy máselege baılanysty IIM Memlekettik til jáne aqparat departamentiniń dırektory Almas Sadýbaev medısınalyq aıyqtyrǵyshtarǵa qatysty arnaıy túsindirme jasady. Quzyrly organ ókili óz málimdemesinde 2010 jyly 32 medısınalyq aıyqtyrǵysh (qazirgi ýaqytta Ýaqytsha beıimdeý jáne ońaltý ortalyqtary) densaýlyq saqtaý organdarynyń quzyretine berilgenin jáne bul rette mas adamdardy tıisti oryndarǵa jetkizý fýnksııasy ishki ister organdarynyń quzyretinde qaldyrylǵanyn aıtady. Sonymen qatar, ol: «el ishinde osyndaı 29 ortalyq jumys isteıdi, olarda barlyǵy 598 tósek-oryn bolǵanymen, qajettilik tolyq qamtamasyz etilmeıdi. Biz qoldanystaǵy ortalyqtardy 240 tósek-orynǵa keńeıtýdi usynamyz jáne 595 tósek-oryndy qamtıtyn qosymsha taǵy da osyndaı 38 ortalyq ashýdy usynyp otyrmyz», – deıdi A.Sadýbaev.
Onyń aıtýynsha, mundaı mekemeler barlyq aýdan ortalyqtarynda bolǵan. Qazirgi ýaqytta olar tek qalalar men oblys ortalyqtarynda jumys isteıdi. IIM mundaı ortalyqtarmen elimizdiń barlyq aýdandaryn qamtýdy kózdep otyrǵan joq. Al keıbir jekelegen úsh-tórt aýdan úshin bir ortalyq bólse, jetkilikti bolady dep boljanýda.
Aıta keteıik, qazirgi ýaqytta mas kúıinde jasalǵan qylmystyq quqyq buzýshylyqtar sany sharyqtaý shegine jetip tur. Aǵymdaǵy jyldyń 9 aıynda mas kúıinde 14 myńnan astam qylmystyq quqyq buzýshylyqtar jasalǵan bolsa, ótken jyldyń 12 aıynda bul kórsetkish 12,7 myńdy quraǵan. Sonymen qatar, mas kúıinde quqyqbuzýshylyq jasaǵany úshin ustalǵan adamdar sany da kún sanap artyp kele jatqanyn statıstıkalyq derekter rastaıdy.
Nurlybek DOSYBAI,
«Egemen Qazaqstan»