Qaraǵandy oblysynda metallýrgııa salasy boıynsha eki birdeı ınvestısııalyq iri joba iske asyrylmaqshy. Jalpy quny 14,5 mlrd teńge bolatyn bul jobalar oblys ákimdiginde ótken Memlekettik ındýstrııalyq-ınnovasııalyq damý baǵdarlamasy jónindegi keńes otyrysynyń qaraýyna usynylǵan bolatyn.
Atalǵan keńes óndiris salasyn órkendetýge septigi tıetin bul jobalardy 2015-2019 jyldarǵa arnalǵan kásipkerlikti qoldaý kartasyna engizýdi biraýyzdan maquldady.
Oblystyń Shet aýdanynda ornalasatyn «Katodty mys shyǵarý boıynsha zaýyt qurylysy» jobasyn «Saryarka Copper processing» JShS júzege asyrmaqshy. Jańa zaýyt salynyp bitken soń, ol óndiristiń tolyq sıklin atqaratyn keshenge aınalady. Mysaly, kendi qazyp alyp, shıkizatty óńdeýge daıyndap, sonan soń baryp katodty mys óndirý syndy jumystardyń barlyǵy da zaýyttyń óz ishinde atqarylatyn bolady.
Katodty mys óndiretin keshen iske qosylǵannan keıin bul jerde 350 adam jumyspen qamtylady. О́ndirisi joǵary tehnologııaǵa laıyqtalǵan zaýyttyń ónimin bolashaqta Qytaı men Eýroodaq elderiniń naryǵyna shyǵarý kózdelgen.
Metallýrgııalyq óndiristi damytý jáne katodty mys eksportyn arttyrýǵa baǵyttalǵan taǵy bir joba Balqash qalasynda iske asyrylady. Qazirdiń ózinde bul jerde «Edvans Maınıng Tehnolodjı» fırmasy Saıaq ken ornyndaǵy qaldyqtardan SX-EW ádisi boıynsha mysty siltisizdendirip aıyratyn tájirıbelik zaýyttyń qurylysyn bastap ketti. Jobanyń jalpy quny 513 mln teńge. Jańa zaýyttyń ónimderi aldymen el ishindegi qajettilikti óteıtin bolady. Sonymen qatar, Reseı, Qytaı, Túrkııa jáne Eýroodaq elderine eksportqa shyǵarý da josparda bar.
Qaırat ÁBILDINOV,
«Egemen Qazaqstan»
QARAǴANDY