Din salasyna qatysty aqparattyq saıasatty ońtaıly júrgizýdiń qoǵamymyz úshin paıdasy zor ekeni belgili. Osy oraıda ótken juma kúni Aqparat jáne kommýnıkasııalar mınıstrliginiń Aqparat komıteti arnaıy semınar uıymdastyrdy.
Memlekettik organdar men BAQ ókilderi qatysqan semınar «Dinaralyq qatynastar salasyndaǵy memlekettik aqparattyq saıasatty júzege asyrý jáne BAQ-ta lańkestik pen dinı ekstremızm máselelerin jarııalaý erekshelikteri» taqyrybyn qamtydy.
Jıyndy Din isteri jáne azamattyq qoǵam mınıstrligi Din isteri komıtetiniń tóraǵasy Ǵalym Shoıkın ashyp, kórsetilgen taqyryp boıynsha habarlama jasady.
– Elimizde 18 konfessııa bar. Olardyń ókilderi bir-birimen yntymaqtasyp, qoǵamymyzǵa qajetti túrli áleýmettik sharalardy birlese atqarýda. Bul Qazaqstandaǵy konfessııalar arasyndaǵy jarasymdy qarym-qatynasty kórsetedi, – dedi Ǵ.Shoıkın. Sondaı-aq, komıtet tóraǵasy memlekettik organdardyń zańdy tirkelgen dinı uıymdarmen tyǵyz baılanys ornatyp otyrǵanyn, olardyń qyzmetin zańnamalyq turǵyda qamtamasyz etýde tıisti jumystar óz deńgeıinde atqarylyp kele jatqanyn atap ótti.
Sonymen qatar, spıker din salasyndaǵy keıbir mańyzdy máselelerge de toqtaldy.
– Dinniń atyn jamylyp, el ishine iritki salyp, túrli alaýyzdyqtar týdyrǵysy keletinder qoǵamymyzda bar. Bul jaǵdaıat qazirgi tańda kún tártibindegi ózekti jaıttardyń biri bolyp tur. Atalǵan másele tek bizdiń elimizge ǵana tán emes. Ol búkil álemdi tolǵandyrady. Dinı ekstremızm men terrorızm óziniń aýqymyn keńeıte tústi, – dedi spıker. Onyń aıtýynsha, elimizdegi din salasyndaǵy keleńsiz kórinister negizinen dinı saýatsyzdyqtan týyndaýda. Dinge jańadan bet burǵan keıbir otandastarymyz jat aǵymdardyń ýaǵyzdaryna uıyp nemese ǵalamtordaǵy kesirli, kereǵar baǵyttaǵy dinı nasıhattarmen tanysyp, sonyń nátıjesinde qoǵamda dinı senimi bóten azamattar paıda bolýda.
Odan ári spıker el ishinde aqparattyq túsindirý jumystaryna basa mán berilip otyrǵanyn sóz etti.
– Biz Qazaqstan musylmandar dinı basqarmasymen birlesip, el ishinde zaıyrly memleket degen uǵymnyń mánin, adamdardyń quqyqtaryn, osy salada júrgizilip jatqan saıasattyń maqsatyn túsindirý sharalaryn qolǵa alyp otyrmyz. Bul, ásirese, dinge jańadan bet burǵan jandar úshin mańyzdy. Sonymen qatar, kereǵar pikirlerdiń jeteginde júrgen naqty toptarmen jumys júrgizýge erekshe kóńil bólinýde, – dedi Ǵ.Shoıkın. Onyń aıtýynsha, dinı ekstremızmge qatysty isti bolǵandarǵa, dinı jat aǵymdardyń ókilderine bilikti dintanýshylardyń qatysýymen túsindirý sharalary júıeli túrde júrgizilýde.
Sondaı-aq, komıtet tóraǵasy jat aǵymdardyń qoǵamymyzǵa enip ketýiniń sebepterin, olardyń zańsyz áreketterine qarsy tıisti sharalar qolǵa alynyp jatqanyn, qyzmeti zańmen shektelgen uıymdardyń astyrtyn zańsyz kitaptar taratyp, kereǵar ýaǵyzdar aıtyp, sharalar ótkizýine tosqaýyl qoıý isi basty nazarda ekenin jetkizdi. Bulardan bólek, Ǵ.Shoıkın atalǵan máselede buqaralyq aqparat quraldarynyń róline toqtaldy.
Budan keıin Aqparat komıteti «Taldaý jáne aqparat ortalyǵy» respýblıkalyq memlekettik kásiporny dırektorynyń orynbasary Mıhaıl Komıssarov «Lańkestikke qarsy sharalardy júrgizý kezinde dáıeksiz jáne arandatýshylyq pıǵyldaǵy habarlardy áleýmettik medıa jáne ınternet-BAQ-ta monıtorıng jasaý» taqyrybynda habarlama jasady. Ol óz sózinde keıbir saıttarda, áleýmettik jelilerde qısynsyz, dálel-dáıeksiz málimetter, qoǵamda úreı týdyratyn jalǵan habarlar qylań berip qalatynyn atap ótti.
Semınar sońynda spıkerler qandaı da bir ekstremıstik jáne lańkestik áreketter turǵysynda materıal jarııalaý barysynda buqaralyq aqparat quraldarynyń barynsha yjdaǵatty bolý qajettigin atap ótti.
Joldybaı BAZAR,
«Egemen Qazaqstan»