Aldaǵy jyly elimizde ótetin EKSPO-2017 halyqaralyq kórmesine ázirlik sharalary Qaraǵandy oblysynda qarqyndy júrgizilýde. Osy kórme aıasynda shetelden keletin qonaqtarǵa arnalǵan qyzyqty týrıstik baǵyttardyń biri – kómirli Qaraǵandynyń shahtalaryn aralaý, dálirek aıtqanda, kánigi kenshiler sııaqty jer astyna túsý bolmaq. Shahta túgil, ǵarysh saparyna táýekel etip, tipti sol úshin mıllıondaǵan dollar qarajat tóleýge daıyn turatyn keı jandar úshin bul bir tartymdy saıahat bolýy tıis. Qonaqtar úshin qaýipsizdik sharalary qanshalyqty dárejede ekenin baǵamdaý maqsatynda oblys basshysy Nurmuhambet Ábdibekov tıisti shahtalarǵa aldymen ózi túsip, kóz jetkizýdi josparlap otyr.
Kásipkerlik pen bilim basqarmalary basshylarynyń málimdeýinshe, sheteldik qonaqtar úshin osyndaı saıahat uıymdastyrýdyń eki joly bar. Onyń biri jumys istep turǵan shahtalardyń birinde qarastyrylyp jatsa, ekinshi joba kolledj shákirtterin tájirıbeden ótkizýge arnalǵan qaýipsiz tájirıbelik lavada júzege asyrylýy múmkin.
– Qalaı degenmen, kenshiler men bul saladan habary bar bolashaq mamandar óz aldyna, qarapaıym adamdar, ıaǵnı týrıster úshin ken óndirý ornynda esh qaýiptiń bolmaıtynyna ábden kóz jetkizýimiz kerek, – deıdi óńir basshysy.
Al ázirge EKSPO-2017 kórmesiniń Qaraǵandy oblysy boıynsha alty týrıstik baǵyty resmı túrde bekitilgen. Olarǵa jaýapty «NomadicTravelKazahstan», Qarqaraly memlekettik ulttyq tabıǵı parki jáne «Pavlın-Týr» týrıstik operatorlary «Astana EKSPO-2017» ulttyq kompanııasymen áriptestik jónindegi memorandýmǵa qol qoıysqan. Bul týraly oblystyń kásipkerlik basqarmasynyń basshysy Tatıana Ablaeva málimdedi. Osy baǵyttar Investısııalar jáne damý mınıstri men Mádenıet jáne sport mınıstriniń ortaq buıryǵymen bekitilgen EKSPO-2017 halyqaralyq kórmesiniń qonaqtaryna arnalǵan týrıstik baǵyttar tizimine engizilgen.
Buǵan qosa, sheteldik qonaqtar úshin «Sheber» qolóner ortalyǵy da esigin aıqara ashpaq. Munda kelýshiler qazaqtyń ulttyq qolónerimen, onyń búgingi týyndylarymen tanysyp qana qoımaı, estelikke teri men kıizden jasalǵan zattardy, zergerlik buıymdardy, taǵy da basqa yńǵaıly dúnıelerdi ala alady.
Sheteldik qonaqtardy qabyldaýǵa qazirdiń ózinde jalpy sany 13 myń oryndyq 220 qonaq úı ázir. Olar týraly aqparattar onlaın-brondaýdyń
www.booking.com sııaqty álemdik júıelerine ornalastyrylǵan. Kórmege bıletterdi de onlaın júıe arqyly alýǵa bolady. Mezgili taıaǵanda qalanyń halyq kóbirek shoǵyrlanǵan oryndarynda arnaıy kassalar ashylady. Týroperatorlar óz qonaqtary úshin 8 myń bıletti alyp ta qoıdy. Ár bılettiń quny 4-7 myń teńge aralyǵynda bolmaq.
«QazAvtoJol» ulttyq kompanııasy» AQ Qaraǵandy fılıalynyń dırektory Qanat Shaımınniń málimdeýinshe, Astana–Temirtaý avtodańǵyly
1 jeltoqsanǵa deıin tolyq daıyn bolady. Jol jóndeýshiler, sonymen qatar, Qarqaraly ulttyq parki men Ulytaý tabıǵat qoryǵyna aparatyn joldardy da taqtaıdaı etýdi, jol boıynan qosymsha pavılondar men demalys oryndaryn iske qosýdy josparlap otyr.
Qaraǵandylyq óndirýshiler EKSPO-2017 nysandaryn salýshylarǵa, sondaı-aq temir-beton buıymdaryn, jylý radıatorlaryn, qubyrlar, qurylys qospalaryn, boıaý-syrlaý ónimderin, órt sóndirý júıeleri men quraldaryn jetkizip berip otyr. Oblystyq basqarma Astanadaǵy qurylystardyń barysyna turaqty monıtorıng jasap otyrady. Jyl sońyna taman negizgi nysandar iske qosylady. Iаǵnı, sol kezde olarǵa basqa da ónimder qajet bolady. Mata, jıhaz, basqa da kerek-jaraqtardy óndirýmen aınalysatyn uıymdar sol kezde jańa kelisimsharttar jasasýǵa daıyn bolýy kerek.
EKSPO-2017 kórmesi aýylsharýashylyq ónimderin óndirýshilerge de tıimdi bolmaq. Olar Astananyń kúrt ósetin suranysynyń arqasynda ózderi shyǵaratyn ónim kólemin edáýir arttyra alady. Oblys ákimi joǵarydaǵy jıynda aıtqandaı, bul oraıda meılinshe shıraq qımyldaý kerek. Burynnan bar jetkizý tásilderinen bólek, sharýa qojalyqtary óz ónimderin tikeleı alyp bara alatyn nysandardy kózdeý qajet.
Qaırat ÁBILDINOV,
«Egemen Qazaqstan»
QARAǴANDY