1999
*1 qańtarda Prezıdent Nursultan Nazarbaevtyń Qazaqstan halqyn Jańa jylmen quttyqtaýy «Egemen Qazaqstan» gazetinde jarııalandy. Onda elimiz boıynsha ortasha jalaqy, ortasha zeınetaqy bir kezdegi odaqtas respýblıkalardyń arasynda eń joǵary deńgeıde ekendigi atap kórsetildi.
*10 qańtarda elimizde prezıdenttik saılaý ótti. Balamaly negizde demokratııalyq úrdispen ótken bul saılaýda Qazaqstan Respýblıkasynyń Prezıdenti bolyp 81,71 paıyz daýys alǵan Nursultan Nazarbaev qaıta saılandy.
* 13 qańtarda Prezıdent Nursultan Nazarbaev Almatydaǵy óz rezıdensııasynda esimi elge keńinen tanymal ardagerlerdiń bir tobyn qabyldady. Aıta keteıik, Elbasyna demokratııalyq negizde balamaly saılaýǵa túsýge qolqa salǵan ardagerler qaýymynyń aıtýly ókilderi bolatyn.
*15 qańtarda Almatydaǵy ulttyq kitaphanada Elbasy Nursultan Nazarbaevtyń «Qalyń elim, qazaǵym» atty jańa kitabynyń tusaýkeseri ótkizildi. Kitapta Qazaqstannyń ótken tarıhy men qazirgi bet-beınesi, onyń damýynyń bolashaǵy týraly Memleket basshysynyń sóılegen sózderi jınaqtalǵan.
*20 qańtarda Astana qalasynda Qazaqstan Respýblıkasynyń Prezıdenti Nursultan Nazarbaevtyń óz qyzmetine kirisý rásimi – ınaýgýrasııa ótti. Jıynda Elbasy: «Búgingi kún – men úshin erekshe kún. Árıne, men adam retinde osy saılaýda jeńiske jetkenime qýanamyn, halqym maǵan tarıhymyzdyń taǵy da bir qıyn-qyspaq kezinde zor senim artqanyna mereılenemin, – dedi.
* 21 qańtarda Prezıdent jańa Úkimetti qurýǵa kiristi. Elbasy Jarlyǵymen Nurlan Balǵymbaev Qazaqstan Respýblıkasynyń Premer-Mınıstri bolyp taǵaıyndaldy.
*23 qańtarda Amerıka Qurama Shtattarynyń Qazaqstan Respýblıkasyndaǵy Tótenshe jáne ókiletti elshisi Rıchard Djons Prezıdent Nursultan Nazarbaevqa óz eliniń basshysy Bıll Klıntonnyń joldaýyn tabys etti.
*28 qańtarda Shveısarııanyń Davos qalasynda kezekti dúnıejúzilik ekonomıkalyq forým ashyldy. Forým jumysyna Qazaqstan Prezıdenti Nursultan Nazarbaev qatysty.
* 12 aqpanda Prezıdent Jarlyǵymen «Qazaqstan Respýblıkasynyń Ulttyq ǵylym akademııasy» respýblıkalyq memlekettik mekemesi quryldy. Qazaqstan Respýblıkasy Ulttyq ǵylym akademııasynyń prezıdenti bolyp Naǵıma Ábenqyzy Aıtqojına taǵaıyndaldy. Kezinde Ǵylym akademııasyn onyń aǵasy, Lenındik syılyqtyń laýreaty Murat Aıtqojın basqarǵan bolatyn.
* 19 aqpanda Astanada Qazaqstan Prezıdenti Nursultan Nazarbaevtyń, Qyrǵyzstan Prezıdenti Asqar Aqaevtyń jáne О́zbekstan Prezıdenti Islam Karımovtiń kezdesýi ótti. Ol úsh eldiń arasyndaǵy Máńgilik dostyq týraly sharttyń eki jyldyǵyna arnaldy.
* 2 naýryzda el gazeti «Egemen Qazaqstannyń» elordaǵa kóship kelýi aıaqtaldy. Bas basylymnyń osy kúngi nómiri Astana qalasynan shyqty.
* 11 naýryzda Elbasy Jarlyǵymen Jambyl oblysynyń Lýgovoı aýdany Turar Rysqulov aýdany, Soltústik Qazaqstan oblysynyń Sovet aýdany Aqqaıyń aýdany bolyp ataldy. Aqtóbe qalasynyń Aktıýbınsk degen oryssha transkrıpsııasy Aktobe bolyp ózgertildi.
* 20 naýryzda Prezıdent Nursultan Nazarbaev Naýryz merekesine oraı el halqyn quttyqtaýy «Egemen Qazaqstan» gazetinde jarııalandy.
*2 sáýirde Máskeýde TMD Memleket basshylarynyń keńesi ótti. Onda Ujymdyq qaýipsizdik kelisimin uzartý (О́zbekstan, Ázerbaıjan, Grýzııadan basqa) týraly hattamaǵa, TMD-nyń damý baǵyttary týraly deklarasııaǵa, 1994 jylǵy 15 sáýirde qabyldanǵan Erkin saýda aımaǵyn qurý týraly Kelisimge ózgertýler men tolyqtyrýlar engizý týraly hattamaǵa, TMD organdarynyń qurylymyn reformalaý jáne jetildirý týraly sheshimge qol qoıyldy. Sondaı-aq, Uly Otan soǵysyndaǵy Jeńistiń 55 jyldyǵyna ázirlik jaıy talqylandy.
* 8 sáýirde Aqmola oblysynyń shekarasy ózgertildi, oǵan Soltústik Qazaqstan oblysynyń Eńbekshilder, Zerendi, Shýchınsk aýdandary men Kókshetaý qalasynyń aýmaqtary engizildi. Aqmola oblysynyń ákimshilik ortalyǵy Astana qalasynan Kókshetaý qalasyna kóshirildi. Osy kúni Ashǵabadta Ortalyq Azııa Memleket basshylarynyń otyrysy ótti. Oǵan N.Nazarbaev, A.Aqaev, I.Karımov, E.Rahmonov, S.Nııazov qatysty. Sammıt nátıjesi boıynsha Araldy qutqarý Halyqaralyq qorynyń erejesi bekitildi.
*12 sáýirde Almatydaǵy Respýblıka saraıynda Qazaqstan Ǵylym akademııasynyń tuńǵysh prezıdenti Qanysh Imantaıuly Sátbaevtyń 100 jyldyǵyna arnalǵan saltanatty jınalys bolyp ótti. Saltanatty jıynǵa Elbasy Nursultan Nazarbaev qatysty.
* 16 sáýirde Almatyǵa jumys saparymen Palestına memleketiniń Prezıdenti Iа.Arafat keldi.
* 19 sáýirde Prezıdent N.Á.Nazarbaev Astanaǵa resmı saparmen kelgen Chehııa Premer-mınıstri M.Zemandy qabyldady.
* 21 sáýirde Prezıdent N.Á.Nazarbaev Qazaqstanǵa resmı saparmen kelgen Katar memleketiniń Ámiri sheıh Hamad ben Halıfa ál Tanımen kezdesti.
*23-25 sáýir aralyǵynda Prezıdent N.Á.Nazarbaev NATO-nyń sammıtine qatysý úshin Vashıngtonda saparmen boldy. Osy kúnderi Prezıdent AQSh-tyń saıası jáne iskerlik áleminiń ókilderimen kezdesti. Elbasy AQSh Prezıdenti B.Klıntonmen kezdesti. B.Klınton Azııadaǵy senim sharalary men qaýipsizdikti nyǵaıtý jónindegi Qazaqstannyń bastamasyn mysal retinde keltire otyryp, onyń aımaqta beıbitshilikti saqtaýda úlken róli bar ekenin atap kórsetti. Sondaı-aq, ol N.Á.Nazarbaevtyń beıbitshilik pen qaýipsizdikke qatysty ǵalamdyq problemalardy sheshýde NATO Reseımen tyǵyz jumys isteýi tıis degen pikirimen kelisti.
*6 shildede Prezıdent N.Á.Nazarbaev Túrkııa Prezıdenti S.Demırelmen kezdesti. Kezdesý barysynda ekijaqty máseleler talqylandy.
* 14 shildede Prezıdent Nursultan Nazarbaev resmı saparmen Astanaǵa kelgen Moldova Prezıdenti Petr Lýchınskımen kezdesti. Kelissóz barysynda eki el arasyndaǵy ekonomıkalyq yntymaqtastyqty damytý máseleleri qozǵaldy.
* 24 tamyzda Bishkekte «Shanhaı bestigi» elderi basshylarynyń sammıti ótti.
*2 qyrkúıekte Prezıdent N.Á.Nazarbaev Astanaǵa resmı saparmen kelgen Armenııa Prezıdenti R.Kocherıanmen kezdesti. Sapar nátıjesinde Ekonomıkalyq yntymaqtastyq jónindegi birikken komıssııa qurý týraly kelisimge qol qoıyldy.