Jaqut janaryn Enesaı jaqtan eljireı tigetin túbi bir týysqan Saha eliniń óneri qazaqqa da jat emes. Jyl on eki aıda óneriniń ár taramyn qazaq pen qyrǵyzǵa tanystyrý maqsatynda saparlap qaıtatyn baıyrǵy dástúri bar. Sol dástúrimen P.Oıýnskıı atyndaǵy Sahanyń akademııalyq drama teatry Almatyǵa gastroldik saparmen kelip, 20-21 qazan kúnderi Ǵ.Músirepov atyndaǵy Balalar men jasóspirimder teatrynyń sahnasynda óner kórsetpek.
Almaty kórermenderiniń eki kún boıy Saha eli sahna sheberleriniń tańǵajaıyp tanymynan týǵan ónerin tamashalaýǵa múmkindik alýy – mádenı ómirimizdegi aıtýly oqıǵa. Reseıdiń eń iri ulttyq teatrlarynyń birinen sanalatyn óner ordasy qazaqstandyq kórermenderge Sh.Aıtmatovtyń «Teńiz jaǵalaı júgirgen tarǵyl tóbeti» men Ý.Shekspırdiń «Lır patshasyn» usynyp otyr. Atap óterligi, bul eki spektakl de Saha teatrynyń qymbat qazynasy, saf altyndaı biregeı týyndysy bolyp esepteledi.
Almatyǵa kelip, dóńgelek ústel basynda emen-jarqyn áńgime-dúken qurǵan teatr dırektory, Reseıdiń eńbek sińirgen ártisi, Saha Respýblıkasynyń halyq ártisi Anatolıı Nıkolaev, Reseı jáne Iаkýt ASSR-iniń eńbek sińirgen ártisi, Reseı Memlekettik syılyǵynyń laýreaty, akter Efım Stepanov, Saha eliniń halyq ártisi Izabella Nıkolaeva qazaq jýrnalısterin qyzyqtyrǵan kóptegen saýaldaryna jaýap berip, búgingi Saha akademııalyq teatrynyń tynysy men teatr keńistigindegi orny týraly oıymen bólisti.
Teatr dırektory A.Nıkolaevtyń aıtýynsha, Reseı quramyndaǵy usaq ulttardyń ishinde alǵashqylardyń biri bolyp Ulttyq teatr qurýǵa qol jetkizýdiń ózi úlken erlik. Tek Reseıde ǵana emes, álemdik teatr úrdisinde jetekshi oryn ıelenetin bul ujymnyń bedeline qyzyǵa qaraıtyndar kóp. Teatrdyń shyǵarmashylyq ujymynyń bıik deńgeıdegi sheberligin álemdik teatr qaýymdastyǵynyń eń mártebeli ókilderiniń ózi biraýyzdan moıyndap, halyqaralyq sahnanyń serkesi retinde tanyǵan. Munshama bıik baǵa men mereıdi asqaqtatatyn abyroıǵa bul ujym birden kenele qalǵan joq. Buǵan Saha eliniń biregeı ulttyq dástúri men mádenıeti, klassıka men jańashyldyqty sheber úılestire biletin sýretker rejısserler men talantty akterlerdiń mańdaı teri jetkizdi.
Saha teatry repertýaǵa óte baı. Iаkýt jáne orys dramatýrgııasynyń klassıkterinen bastap, zamanaýı sheteldik dramatýrgterdiń tańdaýly shyǵarmalary bıik talǵammen sahnalanyp keledi. Bul akademııalyq ujym – kóptegen Reseı jáne halyqaralyq teatr festıvaldarynyń jeńimpazy. Saha teatry – Reseı, taıaý shetel men Qıyr Shyǵys elderi ulttyq teatrlarynyń ishinde eń joǵary «Zolotye maskı» syılyǵyna úsh márte qol jetkizgen jalǵyz teatr. Munda Andreı Borısov, Gennadıı Sotnıkov, Efım Stepanov, Innokentıı Lýkovsev, Aıaal Ammosov sekildi bes birdeı KSRO Memlekettik syılyǵynyń laýreattary jumys isteıdi. Ujymda Reseı Federasııasynyń eń irgeli óner ordalarynda bilim alǵan 64 ártis eńbek etýde.
Aıgúl AHANBAIQYZY,
«Egemen Qazaqstan»
ALMATY