TMD Atqarý komıteti janyndaǵy býhgalterlik esep boıynsha Úılestirý keńesiniń tóraǵasy qyzmetine Qazaqstan Respýblıkasynyń ókilin taǵaıyndaý týraly sheshim búgin Astanada ótken keńestiń XIII-otyrysynda daýys berý kezinde jasaldy.
Bul laýazymdy 2017 jyldan bastap, QR Qarjy mınıstrligi býhgalterlik esep jáne aýdıt ádisnamasy departamentiniń dırektory Arman Bekturova atqaratyn bolady.
Onyń kandıdatýrasy kópshilik tarapynan qoldaý tapty. Keńes qurylǵaly beri (2001 jyldan beri) bul laýazymdy Reseı Federasııasynyń ókili basqaryp kelgen bolatyn.
Keńestiń otyrysy 18-19 qazan kúnderi Ázerbaıjan, Belarýs, Qyrǵyzstan, Moldova, RF jáne О́zbekstan ókilderiniń qatysýymen ótti. Sonymen qatar otyrysqa ASSA (Ulybrıtanııa, London) retteýshi organdarmen qarym-qatynastaryn damytý jónindegi dırektory Shahrýh Alı Khan qatysty.
«QR Qarjy mınıstrliginiń keńes tóraǵasy qyzmetine taǵaıyndalýy - býhgalterlik esep salasyndaǵy otandyq mamandardyń kásibı biliktiligine berilgen joǵary baǵa jáne quzyrly organdardyń Úılestirý keńesi aıasyndaǵy belsendi ári tıimdi áriptestiginiń jemisi», - dedi mınıstrliktiń jaýapty hatshysy Natalıa Korjova.
QR Qarjy mınıstrliginiń málimetteri boıynsha, TMD Atqarý komıteti janyndaǵy býhgalterlik esep boıynsha Úılestirý keńesiniń jumysy aýdıtorlyq qyzmetti retteýdiń ulttyq júıesiniń ártúrliligine qaramastan, býhgalterlik esep jáne aýdıt salasyndaǵy mamandarǵa qoıylatyn jalpy talaptardy birizdendirýge baǵyttalyp otyr.