Ońtústik Qazaqstan oblysynyń ákimi Janseıit Túımebaev «Jańa aqparattyq saıasat: baǵdar men bolashaq» taqyrybyndaǵy II respýblıkalyq jýrnalıster forýmyna qatysýshy respýblıkalyq jáne oblystyq BAQ ókilderimen kezdesti.
Júzdesýde ákim baspasóz - memleketimizdiń tynys-tirshiligi men aınasy ekenin aıtyp, respýblıkalyq forýmǵa arnaıy kelgenderi úshin alǵysyn bildirdi. Sonymen birge, aldaǵy jumys josparlarymen bólisti.
Táýelsizdik qundylyqtaryn qalyptastyrýdaǵy BAQ-tyń mańyzy taqyryby boıynsha «Túrkistan» gazetiniń bas redaktory Shamshıdın Pátteev, «Aıqyn» respýblıkalyq qoǵamdyq-saıası gazetiniń dırektor-bas dırektory Nurtóre Júsip, Túrkııa Respýblıkasy «Jıhan» aqparat agenttiginiń Qazaqstandaǵy ókili Iyldyz Doǵan, «Jas Qazaq» gazetiniń bas redaktory Sraıyl Smaıyl, «Qalamger – Medıa» ortalyǵy JShS atqarýshy dırektory Áshimjan Janarbek, «Iýjnyı» Kazahstan» gazeti bas redaktorynyń orynbasary Ismaılov Keńesbaı oılaryn ortaǵa saldy.
«Medıa keńestiktegi báseke: dástúrli BAQ-nyń bolashaǵy» bólimi boıynsha «Zań medıa» korporasııasynyń prezıdenti Dosymbek О́teýǵalıev, «Zamana» baspa úıi dırektory Isa Tasqulov, «Qazaqstan» RTRK aqparattyq-saraptamalyq dıreksııanyń dırektory Erkin Muhamedjanov, «Habar 24» telearnasynyń shef-redaktory Shalqar Qojaev, «TVK» telearnasynyń dırektory Zınaıda Danılova, «Bınıýs» aqparat agenttiginiń shef-redaktory Dáýlethan Jıenqulov sóz alyp, álemdik tájirıbe mysaldaryn keltire otyryp, pikirlerin bildirdi.
Qazaqta «eldestirmek elshiden» degen ataly sóz bar. Memlekettik saıasatty ornyqtyrýda jáne qoǵamnyń ilgerileýine, halyqtar dostyǵynyń nyǵaıýyna jýrnalısterdiń qosar úlesi úlken. Aqparattyq saıasat memleket múddesine qyzmet etýi kerek. Jıynda osyndaı oılar aıtyldy.
Forýmdy «Aıqyn» respýblıkalyq qoǵamdyq-saıası gazeti Astana bıýrosynyń jetekshisi Beısenbaı Tájibaev júrgizip otyrdy.
Qalamgerler de aımaǵymyzdyń kúnnen-kúnge damyp kele jatqan úlgili óńir ekenin tilge tıek etip, Kúngeı ólkeniń ıgi bastamalardyń ordasy, eńbekqor aımaq bolyp tabylatynyn atap ótti. Ońtústiktiń aqparattyq keńistigi damyǵan aımaq ekenine toqtalǵan qarymdy qalamgerler bizdiń oblystan úırener istiń kóp ekenin aıtty.
Jıyn sońynda Janseıit Qanseıituly BAQ ókilderine shyǵarmashylyq tabys tilep, búgingi forýmda talqylanǵan máseleler qoǵamdaǵy kúrdeli problemalardy sheshýde septigin tıgizerine senim bildirdi.
Aıta ketý kerek, Ońtústik Qazaqstan oblysy BAQ sany jaǵynan respýblıkada ekinshi orynda. Qazirgi tańda oblysta 239 BAQ jumys jasasa, onyń 171-i gazet, 38-i jýrnal, 13-i telearna, 4-i radıo jáne 13-i ınternet saıt.