Jaqynda Qazaq ulttyq óner ýnıversıtetiniń «Shopen» konserttik zalynda kóptegen halyqaralyq jáne respýblıkalyq baıqaýlardyń laýreattary, osy oqý ornynyń oqytýshylary, aǵaıyndy kompozıtorlar Serikjan men Álibı Ábdinurovtardyń án-romanstarynan ashyq baıqaý, ıaǵnı qos kompozıtordyń vokaldyq shyǵarmalarynan oryndaýshylardyń dástúrli III baıqaýy ótti.
Jastardyń mýzykalyq shyǵarmashylyǵyn shyńdaý maqsatyndaǵy mundaı mádenı sharalar álemdik tájirıbede óte jıi kezdesetin jaıt. Al endi óner dodasynyń aǵaıyndy kompozıtorlardyń týyndylaryna arnalyp jáne munyń dástúrli sharaǵa aınalýy tek qazaq vokaly ónerine ǵana tán joba bolyp qalatyny daýsyz. Sol sebepti de ánshiler saıysy elimizdiń mýzykalyq ómirindegi eleýli oqıǵa sanalady. Sonymen qatar, muny mýzykanttardyń О́ner ýnıversıtetindegi vokal janryn damytýǵa qosyp otyrǵan úlken úlesi deý kerek. Kompozısııa kafedrasynyń dosenti Serikjan men aǵa oqytýshy Álibı Ábdinurovtar án-romanstaryn oryndaýdan ótken baıqaýdy Qazaq ulttyq óner ýnıversıteti men Kompozıtorlar odaǵynyń Astana qalalyq bólimshesi birlesip uıymdastyryp otyr.
Qazylar alqasyna Qazaqstannyń eńbek sińirgen qaıratkeri, «Vokaldyq óner» kafedrasynyń meńgerýshisi Azamat Jyltyrkózov tóraǵalyq etti. Elordada úshinshi ret ótkizilgen dodaǵa qatysýshylarǵa qalaýlary boıynsha kompozıtorlardyń tańdaýly bir-bir áni men romansyn oryndaý mindetteldi.
Ispanııa topyraǵynda HVI ǵasyrda bastaý alǵan romanstar keremeti qazirgi tańda tórtkúl dúnıeniń kez kelgen buryshyna tarap úlgergen. Olardyń attary ártúrli bolǵanyna qaramastan, názik ıirimi, lırıkalyq sazy bir-birine egiz qozydaı uqsas bolǵandyqtan jas janr qazaq ulttyq án kóginde de qanatyn qomdap, damyp keledi. О́ıtkeni, halqymyzdyń án ónerine romanstar eshqashan jat bolǵan emes.
Shetelderde romansty L.Bethoven, F.Shýbert, R.Shýman, F.Shopen, F.Lıst syndy uly tulǵalar kókke órletse, qazaq romansynyń alyby A.Jubanov, M.Tólebaev, E.Brýsılovskıı, L.Hamıdı, Q.Qojamııarov, S.Muhamedjanov, E.Rahmadıev, Ǵ.Jubanova mýzykalarymen asqaqtady. Soǵan oraı án-romanstar Qazaqstandaǵy kóptegen shyǵarmalardyń beıneli bederine aınalǵany bultartpas shyndyq.
Án ónerin nasıhattaý, shyǵarmashyl jastardy qoldaý, talantty jas mýzykanttardy izdep tabý – vokalshylar baıqaýyn ótkizýdegi basty maqsat. Qatysýshylar baıqaý baǵdarlamasy talabyna saı óner kórsetip, shyǵarmalardy jatqa oryndady. Báıge shartynda jasqa qaraı eshkimge shekteý qoıylǵan joq. Negizinen aqyn Jupar Aqtompyshqyzynyń óleńderine jazylǵan án-romanstar shyrqaldy.
О́zgelerden buryn máre syzyǵyn kesken dúldúlder qoshemettelip, jeńimpazdar dıplomdarmen, aqshalaı syılyqtarmen marapattaldy. Joǵary oqý oryndary stýdentteri arasynda M.Isaeva men A.Qalmaǵanbetova I júldege ıe bolsa, kolledjden M.Romashov oza shaýyp báıge aldy.
Qarashash TOQSANBAI,
«Egemen Qazaqstan»