Aqtóbede gir sportynan álem birinshiligi ótip jatyr. Jarysqa álemniń 37 elinen 440 sportshy qatysady. Olardyń arasynda Reseı, AQSh, Anglııa, Germanııa, Avstralııa, Úndisten jáne Ońtústik Afrıka sııaqty elder bar.
Álem chempıonatynyń ashylý saltanatynda oblys ákimi Berdibek Saparbaev: «Táýelsizdiktiń 25 jyldyǵy qarsańynda álemdik deńgeıdegi sport jarysyn ótkizý óńir úshin úlken qurmet. Táýelsizdik jyldary Qazaqstan sportta da bederli bıikten kórinip júr. Elbasynyń saıasatynyń arqasynda sport elimizde árqashan basymdyqqa ıe bolyp keledi», - dedi.
Álem birinshiligine daıyndyq shtabynyń jetekshisi Vladımır Korenkovtyń aıtýynsha, jarys ótettin «Qonys» sport saraıy jóndeýden ótkizilgen. Birinshilikti ótkizýge oblystyń onnan astam iri kásiporyndary demeýshilik kórsetken. Bir ǵana Aqtóbe oblysynan jarysqa 18 sportshy qatysady.
Satybaldy SÁÝIRBAI,
«Egemen Qazaqstan»