Búgin Qytaıdyń Gýanchjoý qalasy sotynda isi qaıta qaralyp jatqan Aqjarqyn Turlybaı 2014 jyldyń naýryz aıynda Qytaıdyń Malaızııamen keden beketinde 4,5 keli esirtkimen ustalǵan edi.
Týystarymen sol jyldyń 9 naýryzynda sońǵy ret habarlasyp, odan keıin baılanys úzilgen. Aqjarqynnyń Gýanchjoýdaǵy tergeý ızolıatoryna otyrǵanyn týǵan-týystary keıin bildi. Osy is boıynsha Qytaıdyń Gýanchjoý soty Aqjarqyn Turlybaıdy esirtki kontrabandasymen aınalysty dep aıyptap, 2015 jyldyń 15 maýsymynda ómir boıyna bas bostandyǵynan aıyrǵan bolatyn.
Aqjarqyndy tanıtyndar onyń ýnıversıtette úzdik oqıtynyn, shet tilin erkin meńgergenin aıtyp, bul aqparatqa senbegen edi. Anasynyń aıtýynsha, bir qurbysy Aqjarqynǵa sándi kıimder tasymaldaýmen aqsha tabýǵa keńes berip, Alena esimdi bireýmen jáne Djonn atty Nıgerııanyń azamatymen tanystyrǵan. Keıinirek bul jóninde Esirtki zattary, psıhotropty zattar jáne prekýrsorlardyń zańsyz aınalymymen kúresetin Ortaazııalyq aımaqtyq aqparat úılestirý ortalyǵy aqparattyq-saraptamalyq bólimshe (OAAÚO) basshysy Amanjol Orazbaev ta aıtty. Osylaısha, Aqjarqyn nıgerııalyq iri mafııanyń qurbany boldy degen joramal jasaldy.
2016 jyly 7 sáýirde apellıasııalyq satydaǵy sot Aqjarqyn Turlybaıdyń ómir boıyna bas bostandyǵynan aıyrý jazasyn ózgertip, isti birinshi satydaǵy sottyń qaraýyna jiberdi. Búgin jýrnalısterge bergen suhbatynda advokat Fen Chjıszıan kezekti otyrys pen sot sheshimi 2017 jylǵy qańtar aıynyń basynda shyǵady dep úmittenetinin aıtty.
Sarapshylar nıgerııalyq esirtki mafııasynyń búkil álemde tamyryn tereń jaıǵanyn aıtady. Qylmyskerler esirtki saýdasyna kóbine jas qyzdardy tartady. Qazirde OAAÚO málimetter bazasynyń ózinde Qyrǵyzstan, О́zbekstan, Qazaqstan jáne Reseıden 30-ǵa jýyq jas tirkelgen. Olardyń kóbi "qamaýǵa alynǵan", "keıingi jaǵdaıynan habar joq" nemese "ómir boıyna bas bostandyǵynan aıyryldy" degen aqparatpen tur. Qazirgi ýaqytta nıgerııalyq esirtki barondarynyń qurbany bolǵandar arasynda Aqjarqyn Turlybaıdan basqa qyrǵyzstandyq Jibek Sakeeva, Svetlana Kýlbaeva, Semen Sobol, Shovkatbek Iýsýpjanov, Cholpon Shaımbetovalar men reseılik 11 boıjetken tur.
Gúlnur Qýanyshbekqyzy,
"Egemen Qazaqstan"