Belgili zańger ári bloger Ádilethan Moldahan qamaýǵa alyndy. Quqyq qorǵaý organdary zańgerge qatysty jalǵan aqparat taratý faktisi boıynsha sotqa deıingi tergeý júrgizip jatyr. Bul aqparatty Almaty qalalyq polısııa departamenti rastady, dep habarlaıdy Egemen.kz.
«Kúdikti buǵan deıin tonaý qylmysy úshin sottalǵan, qazir oǵan sot tarapynan 10 táýlik merzimge qamaýda ustaý túrindegi bultartpaý sharasy qoldanyldy», delingen polısııa habarlamasynda.
Tergeý múddesine baılanysty ózge aqparat jarııa etilmeıdi.
Polısııa naqty qandaı aqparat týraly sóz bolyp otyrǵanyn habarlaǵan joq. Sońǵy ýaqytta Moldahan áleýmettik jelilerde Almatydaǵy Ál-Farabı dańǵylynda úsh adamnyń ómirin qıǵan rezonanstyq jol-kólik oqıǵasyn jıi kóterip júrgen. Ol jarııalaǵan vıdeolarynda túngi jarysty uıymdastyrýǵa quqyq qorǵaý organdarynyń qatysy bar ekenin málimdegen.