Memleket basshysy Qasym-Jomart Toqaev 17 naýryzda jańa Konstıtýsııasynyń qabyldanýyna baılanysty el tarıhynda alǵash ret ákimshilik raqymshylyq ótkizýdi usynǵan edi. Bul shara azamattar men memlekettiń qaýipsizdigine qater tóndirmeıtin jekelegen qylmystyq jáne ákimshilik quqyq buzýshylyqtar jasaǵan tulǵalarǵa qatysty qoldanylady. Búgin Májilis otyrysynda depýtat Aıdos Sarym júrgizýshi kýáliginen aıyrylǵandardy kólik basqarý quqyǵyn qalpyna keltirýge baǵyttalǵan kez kelgen raqymshylyq tetikterine engizýge qarsylyq bildirdi, dep habarlaıdy Egemen.kz.
Depýtat jýyrda Almaty qalasyndaǵy Ál-Farabı dańǵylynda bolǵan qaıǵyly oqıǵany tilge tıek etti.
«Apatqa kináli dep tanylǵan aıyptalýshynyń áreketteri saldarynan úsh adamnyń ómiri qıyldy. Balalar ata-anasynan aıyryldy, ata-analar balasynan aıyryldy. Bul tragedııa olardyń otbasylarynyń ómirin túbegeıli ózgertti. Endi olardyń ómiri burynǵydaı bolmaıdy.
Ashyǵyn aıtýymyz kerek, mundaı qaıǵyly oqıǵalar árqaısymyzda dármensizdik sezimin, alańdaýshylyq pen jaqyndarymyzdyń ómiri men qaýipsizdigi úshin qorqynyshty týdyrady. Budan da soraqysy – mundaı jaǵdaılar qoǵam men bılik arasyndaǵy senimsizdikti kúsheıtip, zań men tártiptiń tıimdiligine kúmán týǵyzady, qoǵamdy bólshekteıdi», dedi Májilis depýtaty.
Almatydaǵy jantúrshigerlik jol apaty: Polısııa basshylary qyzmetinen bosatyldy
Aıdos Sarymnyń aıtýynsha ýákiletti organdar mas kúıinde jasalyp, adam ólimine ákep soqqan jol-kólik oqıǵalary úshin jaýapkershilik tetikterin jan-jaqty baǵalap, jasalǵan qylmystyń aýyrlyǵyna saı jaza merzimderin belgileý jóninde usynystar engizýi qajet. Bul rette halyqaralyq ozyq tájirıbeni negizge alýǵa bolady.
«Prezıdentimiz bastamashylyq etken ákimshilik raqymshylyq qoǵamda oń qabyldandy. Kóptegen sarapshylar men azamattyq qoǵam ókilderi mundaı amnıstııa «Ádiletti Qazaqstan» qurý jolyndaǵy taǵy bir qadam bolady dep esepteıdi, ári áleýmettik turǵydan osal toptarǵa jeńildik ákeledi dep baǵalaıdy. Alaıda, biz teris úrdisterdi de baıqap otyrmyz. Buryn júrgizýshi kýáliginen aıyrylǵan azamattardyń raqymshylyqqa engizý jáne olarǵa kólik basqarý quqyǵyn qaıtarý jónindegi uıymdasqan talaptaryn estip otyrmyz. Biz bul másele boıynsha ustanymymyzdy ashyq jáne naqty bildiremiz: buǵan barýǵa moraldyq quqymyz joq.
Kimder júrgizýshi kýáliginen aıyrylǵan? Kóp jaǵdaıda – zańdy júıeli túrde buzǵan, alkogoldik nemese ózge de mas kúıde kólik tizgindegen, jol qozǵalysy erejelerin elemegen jáne sol arqyly aınalasyndaǵylardyń qaýipsizdigine qater tóndirgen adamdar», dedi ol.
Atyraý oblysynda jol apatynan eki bala kóz jumdy
Depýtattyń oıynsha raqymshylyq – memleket pen qoǵamnyń gýmanızm aktisi. Biraq gýmanızm adam ómirine tikeleı qaýip tóndiretin áreketterge qatysty qoldanylmaýy tıis.
«Bul jaı ǵana ereje buzýshylar emes, bul – áleýetti qaýip kózi. Buryn óz áreketterimen ózgeniń ómirine qaýip tóndirgen adamdar. Olarǵa raqymshylyq aıasynda quqyqty qaıtarý – erteń taǵy da bireýdiń ómirine qaýip tóndirýge múmkindik berý degen sóz. Bul jańa qaıǵyly oqıǵalardyń paıda bolý qaýpin arttyrady. Bizdiń mindetimiz – zań buzýshylardy aqtaý emes, jańa qylmystar men qaıǵyly oqıǵalardyń aldyn alý. Biz «júrgizýshi kýáliginen aıyrylǵandardy» kólik basqarý quqyǵyn qalpyna keltirýge baǵyttalǵan kez kelgen raqymshylyq tetikterine engizýge túbegeıli qarsymyz», dedi depýtat.