Memlekettik qyzmet isteri agenttigi 2026 jylǵy 1 sáýirden bastap Qazaqstanda memlekettik qyzmetke qabyldaýdyń jańartylǵan tártibi engizilgenin habarlady. Jańa júıe irikteý prosesin tolyqqandy sıfrlandyryp, konkýrs rásimderiniń ashyqtyǵy men tıimdiligin arttyrýǵa baǵyttalǵan, dep habarlaıdy Egemen.kz.
Konkýrsqa qatysý úshin kandıdattar ótinishterin eqyzmet.gov.kz portaly arqyly onlaın túrde beredi. Bul tásil ýaqytty tıimdi paıdalanýǵa múmkindik berip, memlekettik qyzmetke kirý prosesiniń ashyqtyǵyn arttyrady.
Memlekettik laýazymdarǵa kandıdattar konkýrsqa qatysar aldynda zańnamany bilýge arnalǵan testileýden, sondaı-aq jeke qasıetterin baǵalaý kezeńinen ótedi. Zańnamalyq test Qazaqstan Respýblıkasynyń Konstıtýsııasy, «Memlekettik qyzmet týraly» jáne «Sybaılas jemqorlyqqa qarsy is-qımyl týraly» zańdary, sondaı-aq Ádep kodeksi boıynsha júrgiziledi. 55 suraqtan turatyn testileýde keminde 30 durys jaýap berý jáne árbir normatıvtik akt boıynsha keminde 5 durys jaýap kórsetý qajet.
Jeke qasıetterdi baǵalaý úsh baǵdarlama boıynsha ótkiziledi:
– basshylyq laýazymdarǵa arnalǵan (10 quzyret);
– basshylyq emes laýazymdarǵa arnalǵan (7 quzyret);
– jumys ótilin talap etpeıtin tómengi laýazymdarǵa arnalǵan (emosıonaldyq, áleýmettik jáne logıkalyq qabiletter).
Testileý nátıjeleri bir jyl boıy jaramdy. Kandıdattar jeke qasıetterdi baǵalaý testin aıyna úsh retke deıin tapsyra alady.
Konkýrsqa eń joǵary ball jınaǵan TOP-5 kandıdat jiberiledi. Qujattar jeke kabınet arqyly usynylady.
Basshylyq laýazymdarǵa kandıdattar esse jazyp beınebaılanys arqyly áńgimelesýden ótedi. Al basqa laýazymdarǵa kandıdattar praktıkalyq tapsyrmalar oryndaıdy (analıtıkalyq jazba, resmı hat daıyndaý, ótinishterdi qaraý).
Ekibastuzda qumar oıyndarǵa qatysqan memlekettik qyzmetshiler anyqtaldy
Júıe barlyq nátıjelerdi avtomatty túrde esepteıdi. Eń joǵary jıyntyq ball jınaǵan kandıdat jeńimpaz dep tanylady. Ball teń bolǵan jaǵdaıda eńbek ótili men bilim deńgeıi eskeriledi.
Jalpy irikteý kezeńderiniń ashyqtyǵy, obektıvtiligi jáne ádildigin qamtamasyz etý maqsatynda (áńgimelesý kezeńin qospaǵanda) barlyq kezeńderde proktorıng qoldanylady.
Batys Qazaqstanda memlekettik qyzmetker ulttyq buıymdar jasaýmen aınalysady
Jańa tártipke sáıkes konkýrs rásimderiniń uzaqtyǵy aıtarlyqtaı qysqaryp, orta eseppen 5–7 jumys kúnin quraıdy (buryn 23–30 kún bolǵan).
Jalpy, jańartylǵan júıe memlekettik qyzmetke qabyldaý prosesin jeńildetip, onyń ashyqtyǵy men ádildigin qamtamasyz etýge, sondaı-aq kásibı kadrlardy tartýǵa múmkindik beredi.