Qazaqstan-Chehııa bıznes-forýmy ótti

Sharanyń ashylý rásimine Qazaqstan Respýblıkasy Investısııalar jáne damý vıse-mınıstri Erlan Haırov, Chehııa Respýblıkasynyń Syrtqy ister mınıstri Lýbomıra Zaoralek jáne Aımaqtyq damý mınıstri Karla Shlehtova qatysty. Júz elýdeı sheteldik, otan­dyq kompanııa ókilderi atsalys­qan shara qos memleket arasyn­daǵy saýda-ekonomıkalyq jáne ınvestısııalyq yntymaq­tas­tyqty jalǵastyrý jáne nyǵaı­týǵa baǵyttalǵan. Olar B2B for­matynda energetıka, kólik qurastyrý, qurylys, farmasev­tıka jáne basqa da salalarda bıznes júrgizý jóninde kelis­sózder júrgizdi. Sonymen qatar, chehııalyq «Prevalent» ın­ves­tısııalyq qory men qazaq­standyq «KAZNEX INVEST» Eksport jáne ınvestı­sııalar ulttyq agenttigi ara­synda yntymaqtastyq týraly memorandýmǵa qol qoıyldy. Jıyn barysynda Inves­tısııa­lar jáne damý mınıstriniń oryn­basary Erlan Haırov elimiz­degi jekeshelendirý úrdi­siniń sátti júzege asyp jat­qanyn áńgimeledi. «Bizdiń aý­qymdy jobalar Chehııa Res­pýb­lıkasynyń ókilderin qyzyq­tyrady degen senimdemiz. Al­daǵy ýaqytta memleket-jeke­menshik áriptestigi júıesin qol­dan­baqshymyz. Qazirgi tańda memlekettik iri kompanııalardy jekeshelendirý úrdisi sátti júzege asýda. Osy oraıda Chehııa bıznesmenderin bizben birlesip jumys júrgizýge shaqyramyz», dedi ol. «KAZNEX INVEST» Eksport jáne ınvestısııalar ulttyq agenttigi» AQ basqarma tóraǵasy Borısbıı Janǵozarov ótken jyly eki el arasyndaǵy taýar aınalymy 270 mıllıon dollardan asqanyn málimdedi. Onyń aıtýynsha, búginde Qazaqstanda Chehııamen birlesken 100 kompanııa jumys isteýde. Ásirese, avtokólik qurastyrý salasy qarqyndy damyp keledi, el aýmaǵynda 20 myńnan astam avtomobıl shyǵarylǵan. Aıta ketken jón, 2005 jyl­dan bastap Qazaqstan men Che­hııa arasyndaǵy taýar aınaly­my 183 mıllıon AQSh dollaryna jýyqtady. Al Eýropa eli­nen túsken tikeleı ınvestısııa­lar kólemi shamamen 560 mıllıon dollardy quraıdy. Jyl ba­syndaǵy derekterge súıensek, Qazaqstanda Chehııa kapıta­lynyń úlesimen 181 kásiporyn tirkelgen, olardyń ishinde 106 ká­siporyn – qyzmet kórsetý baǵy­tynda. Al 2008-2015 jyldar aralyǵynda elimizden Che­hııa­ǵa baǵyttalǵan eksport 559,6 mln AQSh dollaryn quraǵan. Ashat RAIQUL, «Egemen Qazaqstan»