«Táýelsiz Qazaqstan» poıyzy araıly Aqtóbede boldy

Bul – baq qonyp, qut daryǵan, biregeı paıdaly qazbalarǵa baı óńir. Munda Mendeleev kestesindegi barlyq elementter kezdesedi. Sońǵy bes jyldyń qorytyndysynda shetel ınvestorlaryn tartý boıynsha elimizde Atyraýdy ǵana alǵa ozdyryp, ekinshi orynǵa taban tireýiniń ózi óńirdiń ekonomıkalyq áleýetin aıqyndaı túseri sózsiz. Ishki jalpy ónim óndirýde de izdenister bar. Sońǵy ýaqytta memleket pen jekemenshiktiń áriptestigi negizinde salynyp jatqan áleýmettik nysandar qatary kóbeıdi. Jańadan boı kótergen shaǵyn aýdandar da qalanyń qanatyn keńge jaıa tústi. Al aqtóbelik dıqandar bıyl ár gektardan 13 sentner astyq bastyryp, Táýelsizdiktiń 25 jyldyǵyna tolymdy tartý jasady. Bul óńirdegi jarqyn jańalyqtarmen laıyqty jalǵasyn tabýda. Qazaqstan halqy Assambleıasynyń el Táýelsizdiginiń 25 jyldyǵyna arnalǵan respýblıkalyq aksııasynyń aıasynda uıymdastyrylǵan «Táýelsiz Qazaqstan» poıyzynyń Aqtóbege atbasyn tireýi de osyndaı qýanyshty oqıǵa retinde el esinde qaldy. Poıyzdy qarsy alýshylar qarashanyń qaqaǵan qara sýyǵyn da elegen joq, temir jol vokzaly alańyna halyq kóp jınal­dy. Olardyń arasynda oblys orta­lyǵyndaǵy etnomádenı birlestikter ókilderi, oblystyq departamentter men basqarmalar, qalalyq mekemeler basshylary, jastar jáne qala jurt­shylyǵy bar. «Nur Otan» partııasy oblystyq fılıaly tóraǵasynyń birinshi orynbasary Aıbek Saǵıev, Aqtóbe oblysy Qazaqstan halqy Assambleıasy fılıaly hatshylyǵynyń meńgerýshisi Bulbul Eleýsinova bastaǵan qala­lyq­tar qonaqtardy dýmandatyp qarsy aldy, gúl shoqtaryn usyndy. Bıshi­lerdiń myń buralǵan ádemi bıi de, aqtóbelik ónerpazdar shyrqaǵan Qazaq eli týraly patrıottyq án de saltanatty sáttiń ajaryn asha tústi. Úrmeli aspaptar ansambli oryndaǵan áýen araıly Aqtóbeniń aspanyn terbetti. Saltanatty jıyn barysynda sóz alǵan B.Eleýsinova egemendik alǵan jyl­dardaǵy qol jetken jetistik­terimizdi tuǵyrly táýelsizdigimizben sabaqtas­tyrdy. Al «Táýelsiz Qazaq­stan» poıyzy shta­bynyń jetekshisi Ámirjan Álpeıi­sov bastaǵan toptyń osyndaı ıgi qadam­daryna rızashylyq bildirildi. Ol óz ke­ze­ginde poıyzdyń basty maqsaty ha­lyq­qa áleýmettik kómek kórsetý ekenin aıtty. Aıta ketý kerek, top quramynda jeti mınıstrliktiń jáne úsh ulttyq kompanııanyń ókilderi, barlyǵy 270-ten astam maman bar. Onyń 72-si – dáriger. Olar kelisilgen keste boıynsha turǵyndardy qabyldady. Biz «Nur Otan» partııasy oblystyq fılıalyndaǵy qoǵamdyq qabyldaýǵa kelýshiler qatary kóp bolǵanyn kórdik. «Men qoǵamdyq qabyldaýǵa eki máselemen kelip edim. Biri kelinim О́zbekstannan edi, azamattyq ala almaı, sábılerine tıesili qarjysyna qol jetkize almaı júrgen-di. О́zim jumyssyz bolatynmyn. Ekeýi de oń sheshiletin boldy, rıza bolyp turmyn», dedi aqtóbelik Igilik Oralov. Jalpy, qoǵamdyq qabyldaýǵa kelgen 40 adamnyń 15-iniń máseleleri sol jerde oń sheshilgenin bildik. Qalǵandary tıisti oryndarǵa joldanyp, nátıjesi baqylaýda ustalatyn boldy. «Damý» kásipkerlikti damytý qory» AQ ǵımaratynda «Atameken» ulttyq kásipkerler palatasynyń, «QazAgro»kompanııasynyń jáne Ádilet mınıstrliginiń ókilderi bir top kásipkermen kezdesti. Aldymen Ádilet mınıs-trliginiń sarapshysy Saparbek Aqjanbaev sóz alyp, atalǵan poıyzdyń maqsatymen, júrip ótken jolymen qysqasha tanystyrdy. «Atameken» ulttyq kásipkerler palatasynyń ókili Arnur Darbaev kásipkerlerdi tolǵandyratyn máse­leler boıynsha sholý jasady. Olarǵa kásipkerlerdiń quqyqtary men múd­desin qorǵaý, nesıeleý jáne basqa máseleler boıynsha keńes berildi. Kásipkerler aýyl sharýashylyǵyn, shaǵyn kásipkerlikti memlekettik qoldaý baǵdarlamalarynyń keıbir qaı­shy tustaryn kóterdi. Jıynǵa qaty­sýshy eńbek ardageri Eset Sartaev isin jańadan bastaǵysy keletin kásipkerlerge saýattylyq jetispeı­tinin atap aıtty. Al dárigerler №2 qalalyq emhanada qabyldaý júrgizdi. Nevrolog, ýrolog, gematolog, oftalmolog, endokrınolog, gastroenterolog syndy bilikti 18 maman dárigerler syrqattardy qabyldady. Poıyz dárigerleriniń basshysy Serikjan Sabyrálıevtiń aıtýynsha, túske deıin 182 adam dári­gerlerdiń qabyldaýynda bolyp, keńes alǵan, basqa óńirlerdegideı Aqtóbede de júrek-qan tamyrlary, kóz aýrýlaryna shaldyǵýshylar qatary kóp eken. Sondaı-aq, balalar men jas­ós­pirimder úılerinde qaıyrym­dy­lyq aksııalary uıymdastyryldy. «Táý­elsizdik tarıhy – ult rýhynyń ólshemi», «Máńgilik El» sekildi birneshe taqyryp aıasynda kezdesýler, dóńgelek ústelder ótkizildi. Al «Nur Otan» partııasy oblystyq fılıaly ǵımaratynda «Uly Dala eli – Táýelsizdiktiń 25 negizi» táýelsizdik merekesine deıingi ataýly kúnder sharasy saltanatty jaǵdaıda ashyldy. Oblystyq ákimdik ǵımaratynda ótken brıfıngte Á.Álpeıisov poıyz mamandary ótkizgen sharalar men atqarylǵan jumystardy qory­tyn­dylady, BAQ ókilderiniń suraq­taryna jaýap berdi. Onyń aıtýynsha, osy kezeńde 32 myńnan astam adam qamtylǵan, 7 myńǵa jýyǵyna medı­sı­nalyq keńes berilse, 4,5 myńynyń jeke máselelerin sheshýge kómek kórsetilgen. 20 myńnan astam adamǵa ártúrli keńes berilgen. «Táýelsiz Qazaqstan» poıyzy kelesi kezekte Atyraý oblysynyń Maqat stansasyna jol tartty, 27 qarashada qaıta oralyp, Shalqarǵa barady. Satybaldy SÁÝIRBAI, «Egemen Qazaqstan» Aqtóbe oblysy