«Táýelsizdik polıýsi» shańǵy ekspedısııasynyń qatysýshylary – Maǵjan Saǵymbaev, Ilııas Ǵalymbekov, Iýrıı Iýshın jáne Dáýlet Sháripov Ońtústik polıýsten oraldy, dep habarlaıdy QazAqparat.
Ońtústik polıýsti baǵyndyrýshylar shańǵymen 217 shaqyrymdy júrip ótti. Maǵjan Saǵymbaev pen Ilııas Ǵalymbekov Táýelsizdik kúni merekesinde kók týymyzdy Antarktıdanyń eń bıik núktesi- Vınson shyńyna (4892 m) tikti. Tipti merekeni saıahatshylar máńgi muz basqan ólkede qarsy ala otyryp, qazaqstandyqtardy jer sharynyń Ońtústik polıýsinen Jańa 2017 jylmen quttyqtady.
Josparlanǵandaı, olar jerdiń barlyq merıdıandary toǵysqan ońtústik endiktiń 90 gradýs núktesine 10 kúnde-aq jetti. Kúndelikti polıarshylar 20 shaqyrymnan jedel ilgerilep, komandanyń músheleri barlyǵyn sanaǵanda Antarktıka dalasynyń 217 shaqyrymyn júrip ótti.
Qazaq týy Soltústik polıýstiń aspanynda jelbiredi. Al, Qazaqstannyń alǵashqy shańǵy ekspedısııasy Soltústik polıýsti baǵyndyryp, Jerdiń eń soltústik núktesine Qazaqstannyń Memlekettik Týyn jáne Qazaqstan halqy Assambleıasynyń jalaýyn qadady.
Aıta keteıik, shańǵy ekspedısııasy Barneo - Soltústik Polıýs aralyǵyn qamtydy. Top 31 naýryzda Almatydan Máskeýge, Máskeýden - Norvegııanyń Oslo qalasyna, odan ári Longıırge attanǵan bolatyn. Al 4 sáýirde Longıırden Barneo muzdy aerodromyna ushyp baryp, sol jerden Soltústik polıýske deıingi shańǵy ekspedısııasyn bastady.