KASE qazaqstandyq qor bırjasy qarjy naryǵynda jeke ınvestorlardyń sany artqandyǵyn tirkep otyr, dep xabarlaıdy QazAqparat.
2016 jylǵy qarasha aıynyń sońyndaǵy málimetter boıynsha, «Baǵaly qaǵazdar ortalyq depozıtarııi» aksıonerlik qoǵamynda jeke tulǵalar atynan ashylǵan 104 860 esepshot tirkelgen. Bul 2016 jyldyń basyndaǵy kórsetkishten 3348 esepshotqa kóp. KASE alańynda aksııa saýdasynda jeke tulǵalardyń eń kóp tartylǵan kezi 2016 jyldyń shilde aıynda tirkelgen (2271). Osy aıda aksııa saýdasynyń eń kóp brýtto-aınalymynyń úlesi oryn alǵan (62%). Qarasha aıynda bırjada aksııa saýdasyna qatysqan esepshottardyń sany 1 562 boldy. Qarasha aıynda KASE-de aksııa saýdasynyń jalpy brýtto-aınalymy byltyrǵy jyldyń bastapqy aılarymen salystyrǵanda 323%-ǵa ulǵaıdy jáne 5,5 mlrd teńgeni qurady», - delingen KASE-niń resmı málimdemesinde.
Jalpy sońǵy jyldardy alatyn bolsaq, jeke ınvestorlardyń eń iri belsendiligi Halyqtyq IPO baǵdarlamasynyń birinshi jáne ekinshi kezeńderinde tirkelgen. Eske salsaq, onyń aıasynda «QazTransOıl» jáne «KEGOC» kompanııalarynyń IPO-lary ótken bolatyn. Osy qalyptasqan jeke ınvestorlardyń pýly keıin «Ksell», «BAST» jáne «Aqtóbe munaı jabdyqtary zaýyty» kompanııalary IPO-synyń sátti ótýine yqpal etti.
«KASE Indeksiniń 2016 jylǵy oń dınamıkasyna baılanysty, otandyq qor naryǵynda jeke ınvestorlardyń sany artty. Mundaı qarqyn devalvasııalyq boljamdardyń tómendeýi, sonymen qatar munaı jáne mys baǵalarynyń ósýi sebepterimen túsindiriledi», - delingen xabarlamada.