EKSPO-2017 kórmesine daıyndalý elordanyń 2020 jylǵa deıingi damý baǵdarlamasynyń negizgi kezeńderiniń biri bolyp tabylady. Atalǵan kórme Astanaǵa óz múmkindikterin álemge kórsetýge, jańa aımaqtyq týrıstik jáne isker ortalyq retinde ınvestorlardy tartýǵa jaǵdaı jasaıdy. Bul týraly Astana qalasy ákimdiginde ótken jınalysta Áset Isekeshev málimdedi.
Qala ákimdigi «Astana EKSPO-2017» kompanııasymen birlese kórmege daıyndyq jónindegi shtab qurǵan bolatyn. Qazirgi tańda kórmeniń 16 myń qonaǵyn jaıǵastyrý mindeti ákimdikke júktelip otyr. Qazir Astana aýmaǵynda 12 482 orynǵa arnalǵan 164 qonaq úı jumys isteıdi. Bıyl taǵy 2829 oryndyq 23 qonaq úı nysany qoldanysqa berilmek. Sondaı-aq qalada 664 kelýshige arnalǵan 25 hostel jumys isteıdi. 2017 jyldyń mamyr aıyna deıin qonaq úıler men hostelderde 15 975 oryn daıyndalady. Qosymsha jatyn oryn retinde JOO-lar men kolledjderdiń jataqhanalaryn jáne jalǵa beriletin páterlerdi paıdalaný josparlanyp otyr. 7345 orynǵa arnalǵan 17 jataqhana (18 JOO) eriktiler, jumys saparymen kelgen qyzmetkerler syndy EKSPO meımandaryn qabyldaýǵa ázir.
1710 orynǵa shaqtalǵan 10 kolledj jataqhanasy daıyndaldy. Olar eldiń ár aımaǵynan kelgen 40 myń oqýshyny 3 kúnge qabyldaı alady. 2017 jyldyń mamyr aıyna deıin jataqhanalarda 9055 oryn daıyndaý kózdelgen.
"Internet-resýrstardyń málimdeýinshe, Astanada 18 myń páter jalǵa beriledi. Onyń 3 myńy táýlikke jalǵa berilýde, munda da 10 myńǵa jýyq adam qabyldaý múmkindigi qarastyrylǵan. EKSPO-ny ótkizý barysynda uıymdastyrylatyn sharalardyń kúntizbelik jospary ázirlendi. Kórmege týrısterdi kóptep tartý úshin ol sharalar elmen qatar shetelde de tanystyrylyp, nasıhattalady", dep jazdy Astana qalasy ákimdiginiń saıty.