Qazaqstan Respýblıkasynyń Birikken Ulttar Uıymy janyndaǵy Turaqty ókili Qaırat Omarov osy uıymnyń Bas hatshysy Antonıý Gýterrıshke Senim gramotasyn tapsyrdy. Bul týraly Syrtqy ister mınıstrliginiń baspasóz qyzmeti habarlady.
Rásim Uıymnyń Nıý-Iorktegi shtab-páterinde ótti. Rásimnen keıin bolǵan ekijaqty suhbat barysynda Q.Omarov pen A.Gýterrısh jańa qyzmetke taǵaıyndalýlarymen birin biri jyly quttyqtap, taraptar áriptestiginiń odan ári de joǵary qarqynmen damıtyndyǵyna senim bildirdi. Qazaqstandyq dıplomat elimizdiń basshylyǵy atynan Uıymnyń kıkiljińderdi boldyrmaý, bitimgershilik, beıbitshilik ornatý men uzaq merzimdi turaqty damý salalaryndaǵy kópjaqty bastamalarǵa yqpaldasý jónindegi jańa basshysynyń josparlaryn qoldaıtyndyǵyn bildirdi. Sonymen qatar, ol suhbattasyn Qazaqstannyń BUU Qaýipsizdik Keńesindegi basymdyqtary jaıly habardar etip, Ortalyq Azııa elderi men Aýǵanstannyń áleýmettik-ekonomıkalyq damýyna jahandyq Uıymnyń ıgi yqpaldaryn jandandyrýdyń mańyzdylyǵy týraly aıtty.
О́z kezeginde Bas hatshy A.Gýterrısh N.Nazarbaevpen 2016 jylǵy 23 qarashada Astanada ótken kezdesýin jylylyqpen eske ala otyryp, Qazaqstannyń halyqaralyq sahnadaǵy jetistikterine joǵary baǵa berdi. Sonymen qatar, Qazaqstannyń álemniń barlyq memleketterimen, sonyń ishinde Qaýipsizdik Keńesiniń barlyq turaqty múshelerimen tyǵyz yntymaqtastyq ornatqan el retindegi bedelin atap ótti. BUU basshysynyń aıtýynsha, bul jetistikter aımaqtyq qaqtyǵystardy retteý men jahandyq qaýipsizdiktiń basty máseleleri boıynsha qaıshylyqtardy eńserýge ıgi yqpalyn tıgizedi. Sondyqtan da BUU Qazaqstanmen saıası dıalog pen praktıkalyq yntymaqtastyqty odan ári keńeıtýge múddeli, dedi óziniń sózinde A.Gýterrısh.