Búginge deıin memleketaralyq qarym-qatynas pen strategııalyq seriktestikti nyǵaıtý maqsatynda Qazaqstan men Japonııa arasynda bekitilgen quqyqtyq-kelisimshart qujattarynyń sany 44-ten asyp túsedi.
1998 jyly bastalyp, 2000 jyly aıaqtalǵan Ertis ózeniniń ústine salynǵan Semeıdegi aspaly kópir Qazaqstan men Japonııa arasyndaǵy dostyqtyń nyshany. TMD-daǵy eń úlken qurylys nysany sanalatyn kópirdiń keńistiktegi uzyndyǵy – 750 metr. Jalpy uzyndyǵy – 1086 metr de, eni – 35, al bıiktigi – 90 metr.
2000 jyly Tokıodaǵy «Tama» zoobaǵynda Qazaqstannan Kúnshyǵys eline arnaıy syılyq – Qar barysy resmı túrde tartý etildi. Saltanatty jıynda Japonııanyń Syrtqy ister mınıstri Ioheı Kono Japonııanyń atynan Qazaqstan Prezıdenti Nursultan Nazarbaev pen búkil respýblıka halqyna ǵajaıyp syı úshin alǵys bildirip, málimdeme joldady.
2001 jyldyń aqpan aıynda Qazaqstannyń Premer-Mınıstri Imanǵalı Tasmaǵambetov «Kúltegin» tarıhı eskertkishiniń kóshirmesin jasatý jóninde kelissózder júrgizý úshin Japonııaǵa arnaıy saparmen baryp, sol jyldyń mamyr aıynda eskertkish kóshirmesi Astanaǵa jetkizildi.
2005-2015 jyldar aralyǵynda Japonııa Qazaqstanǵa 5 mlrd dollar ınvestısııa quıdy. Al 2015 jylda eki el arasyndaǵy taýar aınalymy 1,4 mlrd AQSh dollaryn quraǵan.
2006 jyly 29 tamyzda ıadrolyq polıgonnyń jabylý qurmetine Nagasakı jáne Semeı qalalary arasynda telekópir uıymdastyryldy. Al 2006 jyldyń jeltoqsan aıynda Japonııa úkimeti BUU-men birlese Semeı óńirine 2 mln dollar kóleminde arnaıy grant bóldi.
2011 jyldyń 11 naýryzda Japonııanyń soltústik-shyǵysynda bolǵan alapat jer silkinis pen joıqyn sýnamı 20 myńǵa jýyq turǵynnyń ómirin qıdy. Japonııadaǵy zilzaladan zardap shekken halyqqa Qazaqstan úkimeti Kúnshyǵys eliniń Qyzyl Krest qoǵamy arqyly 1 mln dollar qarjylaı kómek kórsetip, 33 tonna et-konservi ónimderin jiberdi.
Elbasynyń 2016 jylǵy qarasha aıynda Japonııaǵa sapary kezinde bolat ónimderine negizdelgen Tokyo Rope Almaty kompanııasy ashylǵan. 2016-2020 jyldar aralyǵyna arnalǵan jobanyń ınvestısııa kólemi 70 mıllıon dollardy quraıdy.
Astanada ashylatyn EKSPO-2017 kórmesine Japonııa jeke pavılonyn jabdyqtap, kelýshilerdi qarsy alýǵa daıyndyq ústinde. «Bolashaqtyń energııasy» degen taqyrypta ótetin halyqaralyq aýqymdaǵy kórmede Japonııa ǵajaıyp tehnologııalaryn jurtshylyqqa tanystyrýdy kózdeýde.
Táýelsizdiktiń alǵashqy jyldarynda Hokkaıdo ýnıversıtetiniń qurmetti professory Kandzı Fýdzıı Ortalyq Azııaǵa jasaǵan sapary aıasynda Qazaqstanǵa arnaıy keldi. Bul eki el arasyndaǵy ǵylymı-mádenı baǵyttaǵy baılanystardyń qaınar bastaýyna aınalyp, búgingi tańda eki eldegi JOO maman daıarlaý isinde tereń áriptestik ornaǵan.