Sport360.com saıty fýtboldan Afrıka ulttar kýbogy-2017 týrnırinde Kongo Demokratııalyq Respýblıkasy men Togo quramalary arasyndaǵy úzdik oıynshyny tańdady. Bul týraly sports.kz habarlady.
Bul mártebege kezekti ret «Astana» fýtbolshysy Kabananga Jýnıor ıe boldy. Ol Togo qaqpasyna soǵylǵan úsh goldyń birin óz enshisine jazǵan. Buǵan deıin ol Marokko ujymyna qarsy oıynda jeńisti goldy soqqandyqtan kezdesýdiń úzdigi atanǵan. Atalmysh týrnırde barlyǵy úsh goldyń jáne bir nátıjeli pastyń avtory atanǵan ol surmergender tiziminde kósh bastap tur.
Alǵashynda bas bapker Floran Ibenje ony týrnırge qatysatyndardyń tiziminen shet qaldyrsa, býkmekerler oǵan múldem úmit artpaǵan edi. Alaıda, qazir Bet365.com býkmekerlik keńsesi oǵan 2,5 koeffısıent berip, týrnırdiń bombardıri atanady dep senip otyr. Al «Lıverpýlde» úzdikterdiń biri bolyp júrgen senegaldyq Sadıo Mane 4 koeffısıentpen ekinshi orynda tur.
Toptyq kezeńniń qorytyndysy boıynsha Kabananga úzdik quramanyń qataryna endi.
Afrıka kýbogynda mergendigimen kózge túsip júrgen forvard jaıly álemniń birneshe aqparat quraldary jarysa jazýda.
«Belgııa úshin bul týrnırdiń surmergeni tańsyq oıynshy emes. «Anderleht» sapynda dop tepkenin biletinder bar. Birneshe ret gol soqqanmen, jaraqattarynyń saldarynan boıyndaǵy talantyn asha almady. Degenmen, qazaqstandyq komandanyń eýrokýboktyq oıyndarǵa shyǵýyna septigin tıgizgenin esten shyǵarmaıyq. О́tken maýsymda «Atletıko», «Benfıka», «Galatasaraı» syndy alpaýyt komandalarmen kúsh synasqan», – dep jazdy DHnet.be saıty.
«Astana» oıynshysy Belgııa jerinde 2010-2015 jyldary oınaǵan. 2010-2013 jyldary «Anderlehtte» nebári 7 match ótkizgennen keıin «Beershot» jáne «Rýselare» komandalaryna jalǵa berildi. Al 2013-2015 jyldary «Serkl Brıýggede» oınaǵan soń Qazaqstanǵa kóship keldi.
Aıta keteıik, Afrıka ulttar kýbogynyń shırek fınalynda Kabananganyń komandasy 28 qańtarda Gana quramasyna qarsy ótkizedi.