«Aq jol» partııasy Memleket basshysynyń Joldaýyn qoldaıdy. Keshe Ortalyq kommýnıkasııalar qyzmetinde ótken brıfıng barysynda «Aq jol» partııasynyń tóraǵasy, Parlament Májilisiniń depýtaty Azat Perýashev Elbasy Joldaýynda kórsetilgen bastamalar partııanyń maqsattarymen ushtasatynyn atap ótti.
«Memleket basshysy jaqynda ǵana saıası reformalar týraly Úndeýin jarııalaǵannan keıin, onyń Qazaqstan halqyna Joldaýyn biz úlken úmitpen, erekshe qyzyǵýshylyqpen kúttik. Endi, mine, úmitimiz aqtaldy desek bolady. Sebebi, «Qazaqstannyń Úshinshi jańǵyrýy: jahandyq básekege qabilettilik» atty Joldaýynda Prezıdent kóptegen ózekti máselelerge óz kózqarasyn bildirip, olarǵa baılanysty tapsyrmalar berip otyr. «Aq jol» demokratııalyq partııasy bıznes partııasy retinde, ásirese, ekonomıka jónindegi usynystardy tolyq qoldaıdy jáne olardy iske asyrýǵa óz úlesin qosýǵa daıyn, – dep málimdedi A.Perýashev. – Birinshiden, «Aq jol» demokratııalyq partııasy Elbasynyń Joldaýda aıtqan barlyq tapsyrmalaryn qoldaıdy, bıznes partııasy bolǵandyqtan, bizge, ásirese, ondaǵy ekonomıka jáne kásipkerlikti qoldaý salasyndaǵy bastamalar asa mańyzdy kórinedi».
Ol qazirgi ýaqytta Qazaqstannyń Úshinshi jańǵyrýyn jáne onyń basymdyqtaryn júzege asyrý boıynsha birqatar tapsyrmalar júktelgenin atap ótti. Partııa tóraǵasynyń aıtýynsha, birinshi basymdyq – ekonomıkanyń qarqyndy tehnologııalyq jańǵyrýy. Onyń sheńberinde sıfrlyq tehnologııalardy qoldaný arqyly jasalǵan jańa ındýstrııalardy taratý tapsyrylǵan.
«Úkimetke «Sıfrlyq Qazaqstan» baǵdarlamasyn» ázirleýge tapsyrma berildi. Innovasııalardy qoldaý men olardy óndiriske jedel qosý jańa ındýstrııany qalyptastyrýda asa mańyzdy faktor bolyp tabylady», – dep túsindirdi A.Perýashev. Onyń aıtýynsha, ekinshi keshendi tapsyrma – jańa ındýstrııany qalyptastyrýmen qatar, Qazaqstan ekonomıkasynyń negizgi dástúrli salalaryn damytýǵa yqpal etý.
«Bul oraıda, Memleket basshysy eńbek ónimdiligin aıtarlyqtaı arttyrýdy talap etip otyr. Onyń negizgi faktory avtomattandyrý men zamanaýı
tehnologııalardy barlyq jerlerde engizý bolýy tıis. Úkimetke bıznes ókilderimen birlese otyryp, 2025 jylǵa deıin ekonomıkanyń negizgi salalaryn tehnologııalyq qaıta jaraqtandyrý mindeti tapsyryldy», – dedi depýtat.
Sondaı-aq, ol «Aq jol» partııasy bıznes ortany túbegeıli jaqsartý men ony keńeıtý týraly bastamalardy erekshe yqylaspen qabyldaǵanyn jetkizdi. «Bizdiń strategııalyq maqsattarymyzdyń birinde 2050 jylǵa qaraı eldiń jalpy ishki ónimine bıznestiń qosatyn josparly úlesin keminde 50 paıyzǵa jetkizý qarastyrylǵan», – dedi partııa tóraǵasy.
Aıdar О́RISBAEV,
«Egemen Qazaqstan»