Aýyldaǵy basty máseleler depýtatpen kezdesýde sóz boldy
Shyǵys Qazaqstan oblysyndaǵy Jarma aýdandyq ardagerler keńesiniń tóraǵasy Nurlybek Esbolovtyń aıtýynsha, óńirdegi jol, sý, turǵyn úı máseleleri ótkir kúıde qalyp otyr. Sebebi, búgingi tańda turǵyn úı máselesi kezek kúttirmeıtin sharýaǵa aınalǵan. Jarma óńirinde jalǵyzilikti qarttar men dıplomyn qolyna alyp, aýylǵa kelgen jastarǵa baspana kerek. Aýylda osyǵan oraı eki 16 páterli úıdiń jobalaý-smetalyq qujattary daıyn eken.
– Endi osy joba bıylǵa josparlanǵandyqtan qarjy bólseńizder dep otyrmyz, – dedi Nurlybek Espolov aýyldyń jaǵdaıyn surap arnaıy issaparmen kelgen Parlament Májilisiniń depýtaty Nurtaı Sabılıanovqa ótinish jasap. О́ıtkeni, eldi mekenderde ınfraqurylymdardy jóndeý halyqtyń kópten beri kele jatqan problemasy.
Al Aıagóz – oblystaǵy ǵana emes, elimizdegi áleýeti zor shaǵyn qalanyń biri. Qala halqy negizinen temir jolda jáne aýmaqta ornalasqan bes áskerı qalashyqta jumys isteıdi. Jumyssyzdyq problemasy joq, biraq aýyz sýdyń azabyn aıagózdikter bir kisideı tartyp keledi. Turǵyndardyń 60 paıyzy aýyz sýǵa zárý, sý jáne jylý qubyrlary eskirip, tozyp ketken. Turǵyn úı de qat másele, qalada sonaý 1930 jyly turǵyzylǵan 117 úı bar. Ony súrip tastap, ornyna eki bes qabatty úıdi turǵyzý qolǵa endi ǵana alynǵan is.
– Shyǵys Qazaqstan oblysynda «Aqbulaq» baǵdarlamasy boıynsha aýyz sý máselesin sheshýde 30-dan artyq joba qarjylandyryldy, buıyrsa aýyz sý kelip qalar. Sondaı-aq, jurt jıyrma shaqty jyldan beri kútken «Shar – Qalbataý» arasyndaǵy jol salynady. Ol úshin respýblıkalyq bıýdjetten 2 mlrd 650 mln teńge kóleminde qarajat bólindi. Jumystar aqpan aıynan bastalady, – dedi depýtat Nurtaı Sabılıanov óńirdegi kezdesýinde.
Jol máselesiniń oń sheshimin tabatynyna Aıagóz, Jarma aýdandaryndaǵy birqatar aýyldar men Shar qalasynyń turǵyndary rızashylyq bildirdi. Biraq, halyq bul is sátimen aıaqtalsa jáne jolǵa ketken qarjy tıisti ornyna jumsalsa degendi aıtty. Sebebi, joldy salǵanmen, eki aı ótpeı jatyp, ol shurq tesilip, júrýge jaramaı qalady. Buǵan mysal retinde Semeı qalasyndaǵy jyl saıyn qarjy bólinip, jóndeletin, biraq sapasyz bolǵandyqtan, halyqtyń kóńili tolmaıtyn joldardy aıta ketýge bolady.
Sondaı-aq, aldaǵy ýaqytta Semeı qalasynyń ınfraqurylymyn damytýǵa kóńil bólinedi. Bul da bolsa qala shetinde aýyz sýsyz, jaryqsyz otyrǵan halyqqa ıgi kómektiń biri. Naqty aıtqanda, elektr jaryǵyn tartýǵa, kóshelerdi jóndeýge tıisti qarajat bólinipti. Biraq sol óz maqsatynda júzege assa, soǵan oraı halyq rıza bolyp jatsa, quba-qup. Áıtpese, qarajat bólinip, sodan onyń qaıda ketkendigin maısham alyp izdeý, sotqa júginý kúndelikti kóriniske aınalyp barady. Sondyqtan da, bólingen qarajatty tıimdi, maqsatyna saı jumsaıtyn bolsa, ár eldi mekende oryn alyp otyrǵan ótkir máselelerdi sheshýge bolady.
Raýshan NUǴMANBEKOVA
Shyǵys Qazaqstan oblysy