Batys Qazaqstan oblystyq máslıhaty óńirdegi birneshe áleýmettik, mádenıet nysanyna kórnekti tulǵalardyń esimin berý týraly sheshim qabyldady.
1993 jyly Táýelsizdik merekesi kúni ashylǵan oblystyq qazaq drama teatryna KSRO halyq ártisi Hadısha Bókeevanyń esimin berý máselesi kóp jyldan beri kóterilip júrgen edi. Alaıda, Qazaqstan Respýblıkasy Úkimetiniń «Qazaqstan Respýblıkasyndaǵy memlekettik onomastıkalyq jumys tujyrymdamasynda» elimizge aıryqsha eńbegi sińgen qaıratker tulǵalardy olar qaıtys bolǵanyna 5 jyl tolǵan jaǵdaıda ǵana ulyqtaý belgilengen. Mine, sol merzim ótip, BQO-nyń bas sahnasy belgili ártistiń esimin ıelendi.
Al áý bastan-aq «Qadyr ortalyǵy» atalyp ketken oblystyq mádenıet jáne óner ortalyǵyna aqyn Qadyr Myrza Áliniń esimin berý áldeqashan halyq qoldaǵan, júzege asqan sheshimdi resmı qujattaý dese de bolady. Aqynnyń 80 jyldyǵyna oraı arnaıy salynyp, 2015 jyly 27 maýsym kúni eskertkishimen birge ashylǵan bul ortalyq – búginde Oraldaǵy mádenı sharalar eń jıi ótetin shańyraq.
Sondaı-aq, depýtattar ushqysh, Halyq qaharmany Hıýaz Dospanovanyń esimin Oraldaǵy №30 JOBB mektepke, belgili jazýshy, halyqaralyq «Alash» syılyǵynyń ıegeri Muqades Eslamǵalıulynyń esimin Syrym aýdanyndaǵy ortalyq kitaphanaǵa berý usynysyn qoldady. Bul ataýlar respýblıkalyq onomastıkalyq komıssııa bekitken soń zańdy kúshine enetin bolady.
Qazbek QUTTYMURATULY,
«Egemen Qazaqstan»
ORAL