Astana qalasynyń qylmystyq ister jónindegi aýdanaralyq soty jedel járdem feldsherine shabýyl jasaǵan er adamǵa úkim shyǵardy, dep habarlaıdy Egemen.kz.
Oqıǵa 2026 jylǵy 13 naýryzda bir saýda úıiniń avtoturaǵynda bolǵan. Tergeý málimetinshe, er adam mas kúıinde bolyp, kórsetilgen medısınalyq kómektiń sapasyna kóńili tolmaı, jedel járdem brıgadasymen sózge kelip qalǵan. Keıin ol agressııa tanytyp, feldsherdi soqqyǵa jyqqan. Aýyr jaraqattar tirkelmegen.
Sot prosesinde aıyptalýshy óz kinásin moıyndap, bas bostandyǵynan aıyrýsyz jaza suraǵan. Al jábirlenýshi qatań jaza taǵaıyndaýdy talap etti. Prokýror 1 jyl 6 aı bas bostandyǵynan aıyrýdy usyndy.
Almatyda jedel járdem qyzmetkerine shabýyl jasaǵan kúdikti ustaldy
Sottyń málimetinshe, aıyptalýshy buryn sottalmaǵanymen, qoǵamdyq tártip buzǵany jáne qoǵamdyq orynda alkogol ishkeni úshin ákimshilik jaýapkershilikke birneshe ret tartylǵan. Jeńildetetin jaǵdaı retinde onyń ókinish bildirýi eskerilse, aýyrlatatyn faktor retinde oqıǵa kezindegi mas kúıi tanyldy.
Nátıjesinde sot oǵan 1 jyl 6 aı merzimge, qaýipsizdigi tómen mekemede jazasyn óteýdi belgiledi. Úkim ázirge zańdy kúshine engen joq.
Aıta keteıik, sońǵy jyldary medısına qyzmetkerlerine qarsy zorlyq jaǵdaılary jıilep otyr. Buǵan deıin de Qazaqstanda dárigerlerge shabýyl jasaý faktileri tirkelip, bul másele qoǵamda úlken rezonans týdyrǵan.
Osyǵan baılanysty memleket medısınalyq qyzmetkerlerdiń qaýipsizdigin kúsheıtý sharalaryn qabyldap, zańnamaǵa ózgerister engizip, olarǵa qarsy áreket úshin qatań jaza qarastyrýdy qolǵa alǵan.