Baldyrǵandarǵa shattyq syılaǵan shara

«Álemdegi barlyq bala bir tilde kúledi» degen qanatty sóz bar. Keshe elordadaǵy «SOS balalar aýylynda» baldyrǵandarǵa shattyq syılaǵan erekshe shara ótti. Alǵys aıtý merekesine oraı uıymdastyrylǵan shara barysynda, «Astana Motors» kompanııasy balalardyń ıgiligi úshin úsh birdeı shaǵyn avtobýs­ty syıǵa tartty. «SOS balalar aýylyn­daǵy» baldyrǵandar qurmet­ti qonaqtardy qushaq toly gúlderimen, ystyq yqylas­tarymen qarsy aldy. Búl­dirshin­derge qýanysh syılaıtyn sharaǵa muryndyq bolǵan Par­lament Senatynyń Halyq­ara­lyq qatynastar, qor­ǵa­nys jáne qaýipsizdik komı­teti­niń tóraıymy Darıǵa Nazar­baeva, «Astana Motors» kom­pa­nııa­synyń prezıdenti Nurlan Smaǵulov, «SOS balalar aýyly» korporatıvtik qory Qam­qor­shylyq keńesiniń tóraǵa­sy Serik Seıdýmanov jáne basqa da meı­mandar baldyr­ǵandar­dyń peıiline razy bolyp, tolqy­ǵan­dary júzderinen kórinip turdy. Balalardyń qýanyshyn bóli­sýge kelgen senator Darıǵa Nazarbaeva: – Búgin barshamyz óte qýa­nyshty, shýaqty sharaǵa kýá bolyp otyrmyz. Búgin biz bir-biri­mizdi qýantyp, alǵys aıtamyz. Qymbattylarym meniń, biz birge bolsaq, bir-birimizge meıirimdi bolsaq, alynbaıtyn qamal joq. Eshqashan keri sheginbeý kerek. Eshqashan muńaımaý kerek. Sender – bizge, biz – senderge demeý bolý­ǵa tıispiz, – dedi. – Búginde qan­shama ult ókilderi keń-baıtaq el­i­mizdi mekendep, baqytyn tap­ty. Sol úshin olar qazaq otbasy­laryna alǵys bildiredi. Osy oraı­da, Prezıdentimiz kóktemniń alǵashqy shýaqty kúnin Alǵys aıtý kúni retinde memlekettik mereke etip bekitti. Biz sizderdi Alǵys aıtý kúnimen shyn júrek­ten quttyqtaımyz. Osylaı degen Darıǵa Nazar­baeva olarǵa kólikterdiń kiltin usyndy. Sonymen qatar, se­na­tor qazaqstandaǵy «SOS bala­lar aýyldary» qorynyń qur­met­ti prezıdenti, osy balalar aýyl­darynyń ashylýyna sebep­ker bolǵan adam – anasy Sara Alpysqyzynyń balalar men tárıbeshilerge arnaǵan ystyq sálemin jetkizdi. Sara Al­pys­qyzy bul balalardy umyt­pa­ǵanyn, únemi esinde saqtaıtynyn, balalardyń ortasyna jaqynda ózi keletinin aıtty. «Astana Motors» kompanııa­synyń prezıdenti Nurlan Smaǵulov aıtqandaı, otandyq úsh avtokóliktiń bireýi Astanadaǵy balalarǵa arnalsa, qalǵan ekeýi Almaty men Temirtaý qala­laryndaǵy «Balalar aýyldaryna» jiberilmek. Bir aıta keterligi, quryl­ǵa­n­y­na bıyl 25 jyl tolatyn kom­­panııa aldaǵy ýaqytta qaıy­rym­dylyq maqsattaǵy shara­lar­dyń legin jalǵastyra ber­mek. Kompanııa prezıdenti bala­lar­dy jaqynda elordada ashy­la­tyn «Mega» saýda, oıyn-saýyq or­talyǵynda qydyrtyp, ortalyq­tyń balalarǵa arnalǵan barlyq qy­zyq­taryn kórsetýge ýáde berdi. Baldyrǵandar syı-sııapatqa máz-meıram bolyp qýanyp, ózderiniń aq tilekterin aqtardy. Segiz jasar Eskendir: – Biz endi sabaqqa, seksııa­larǵa, basqa jerlerge osy mashı­namen baramyz. Qalanyń ádemi jerlerin aralaımyz, – dedi. Balalar merekege oraı ar­naıy konserttik baǵdarlama ázir­lepti. Án shyrqap, bı bı­lep, ónerlerin ortaǵa saldy. Qur­metti qonaqtarǵa arnaǵan syı-sııa­pattary da bar eken. Olar tár­bıe­shilerimen birlesip jasa­ǵan fotoa­lbomdy Darı­ǵa Nazar­baevaǵa usyndy. ESKPO-2017 halyqaralyq kór­me­siniń boıtumarlarynyń jum­saq músinderin basqa da meıman­darǵa tartý etti. Elimizde «SOS balalar aýyl­darynyń» ashylǵanyna bıyl 25 jyl tolady. Osyǵan oraı, aldaǵy jazda kólemdi shara ótkizýdi jos­­parlap otyr­ǵan «Bala­lar aýyl­dary­nyń» kish­kentaı turǵyn­dary men tárbıeshileri qurmetti qo­naq­­tardy sol sharalarǵa kelýge shaqyrdy. Arnur ASQAR, «Egemen Qazaqstan» Sýretti túsirgen Erlan OMAROV, «Egemen Qazaqstan»