Osy kúni basylymdardy, kerek qujattardy qolyńa alsań, QR degen eki árip aldyńnan shyǵady. Árıne, bul tolyq jazsań, Qazaqstan, Qazaqstan Respýblıkasy degen uǵymdy bildiredi. «Jaqsy sóz – jarym yrys» dep uqqan qazaq úshin álgi eki áriptiń keıde estilýi qulaqqa túrpideı tıetinin nesin jasyramyz. Tiksindiretini de bar. Baıaǵyda Mıhaıl Gorbachevtiń qaıta qurýy bastalǵanda úlkender jaǵy «qurysań, qury» dep jıi aıtýshy edi. Aqyry quryp tyndy. Qalaı desek te, qaı sózdiń de jaqsy estilgeni kerek-aq.
Táýbe, táýelsiz memleketpiz. Elbasynyń sara saıasatynyń arqasynda tórt qubylamyzdy túgendep, álemge tolyqtaı tanyldyq. Iyqtasyp otyryp, teń dárejede sóılesetin kúnge de jettik. Endeshe, Otanymyz kólemindegi laýazym ıeleriniń, úlken dárejeli mekemelerdiń, qabyldanǵan qujattardyń nemese tıisti organdarǵa jóneltetin hat almasýlardyń aldyna QR-ny qosýdyń qajeti qansha? О́z elimizde QR demesek te, ıaǵnı eki áripti qospasaq ta qalyptasqan Qazaq eli, Qazaqstan memleketi ekenimiz túsinikti emes pe?!
Iá, ózge memleketterge, basqa elderge barǵanda, ne bizdiń Otanymyzǵa ózge jurttardyń memleket, vedomstvo basshylary kelgende, álbette QR dep emes, Qazaqstan nemese Qazaqstan Respýblıkasy dep jazý kerektigi ózinen ózi túsinikti. QR dep jazsa, Qyrǵyz Respýblıkasy da eske túsedi. Bul Qazaq KSR degen sóz keshegi Keńes dáýirinde respýblıkalardy birinen birin ajyratý úshin qoldanylǵany belgili. Sony jańǵyrta berý eldigimizge jaraspaıtyny aıdaı aqıqat. QR UǴA akademıgi dep jazatynymyz da bar. Osyny UǴA desek te, Ulttyq ǵylym akademııasynyń akademıgi ekenin Qazaq eliniń azamattary uǵary haq.
Jalpy, qysqarǵan sózderdi qoldanýdyń belgili bir júıesin qalyptastyryp, eldigimizge, ulttyq uǵymǵa sáıkestendirsek utylmas edik. Keıbir qysqarǵan sózder qarsy aldyńda qasqaıyp turǵanda eki betiń shıedeı qyzarady. Qatar kele jatqan urpaǵyń: «Bul qalaı?» dese, tilińdi tisteriń sózsiz. Tipti, shet jurttardyń árpimen jazylǵan odan da soraqylardy kóziń shalǵanda, sol jarnamaǵa ruqsat bergenderdiń qazaq uǵymyna «saýaty» kemshin-aý demeske sharań joq.
Mundaı nárseni jiti eskerý arqyly qazaqy qalypty buzbaı, keıingige jeteli uǵym jetkizýdi eskersek eken degen nıetti ortaǵa salýdy jón kórdik.
Súleımen MÁMET,
«Egemen Qazaqstan»