«Barselona» fýtbol klýbynyń bas jattyqtyrýshysy Lýıs Enrıke maýsym sońynda qyzmetinen ketetin boldy. Bul týraly ol Ispanııa birinshiliginiń 25-týrynda «Sportıng» komandasyn 6:1 esebimen jeńgen matchtan keıin málimdedi, dep habarlady eurosport.ru. «Kelesi maýsymda «Barselonada» jumys istemeıtinimdi aıtqym keledi. Maýsym sońynda kelisimshartymnyń merzimin uzartpaıtyn boldym. Qazir osy sheshimimdi aıtatyn ýaqyt kelgen sııaqty. Basshylyq maǵan mundaı sheshim qabyldaýda asyqpaýymdy ótindi. Biraq maǵan azdaǵan úzilis kerek, demalǵym keledi. Sol úshin klýbtan ketýdi josparlap otyrmyn. Komanda basshylyǵynyń senimine, fýtbolshylardyń kásibıligine, jankúıerlerdiń qoldaýyna alǵysymdy bildiremin», – dedi Enrıke. Lýıs Enrıke katalondyq klýbqa 2014 jyldyń mamyr aıynda kelgen. Onyń bastaýymen komanda alǵashqy maýsymynda-aq Ispanııa chempıonatynda, Ispanııa Kýbogynda, Chempıondar lıgasynda top jardy. Sondaı-aq, ÝEFA Sýperkýbogyna qol jetkizgen. Jyl sońynda klýbtar arasyndaǵy álem chepıonatyn utyp aldy. 2015/2016 maýsymynda La lıga men el Kýbogynda jeńiske jetti. Al Chempıondar lıgasynyń shırek fınalynda eki matchtyń qorytyndysy boıynsha «Atletıkoǵa» ese jibergen bolatyn. Bıyl katalondyq ujym Ispanııa kýbogynyń fınalyna joldama aldy. Aqtyq synda bul júldeni «Alavespen» sarapqa salady. Al Chempıondar lıgasy 1/8 fınalynyń alǵashqy oıynynda «Parı Sen Jermennen» 0:4 bolyp utyldy. El birinshiliginde 25 oıynda 57 upaı jınap, ázirge kósh bastap keledi.