«Azamattarǵa arnalǵan úkimet» memlekettik korporasııasynda sóıleý jáne estý qabileti buzylǵan azamattarǵa memlekettik qyzmetterdi kórsetýde jańa servıs paıda boldy, dep habarlady aksıonerlik qoǵamnyń baspasóz qyzmeti.
Endi bul adamdarǵa ymdaý tiliniń kásibı mamany arnaıy qosalqy monıtordan shynaıy ýaqyt rejıminde sýrdoaýdarma usynatyn bolady. Bul pılottyq joba Azamattarǵa arnalǵan úkimettiń bastamasymen «Aýǵan soǵysynyń qazaqstandyq respýblıkalyq múgedekter birlestigi» qoǵamdyq birlestigimen birige otyryp júzege asyryldy.
«Azamattarǵa arnalǵan úkimet» memlekettik korporasııasy» KE AQ basqarmasynyń tóraǵasy Abylaıhan Ospanovtyń aıtýynsha búginde halyqqa qyzmet kórsetý ortalyqtarynda sýrdoaýdarma tilin meńgergen 862 maman jumys isteýde. «Degenmen de, biz osymen toqtap qalmaı, odan ári damytýdy jón kórdik. Endi HQKO-nyń jeńildik terezesine júgingen sóıleý jáne estý qabiletteri buzylǵan tulǵalar ym-ısharat tilinde qajetti qujatty qalaı alý kerektigin shynaıy ýaqyt rejıminde aıtyp beretin, onlaın sýrdoaýdarma arqyly qyzmet ala alady» - dedi Ospanov.
Ázirge bul pılottyq joba Astana men Almatynyń HQKO-larynda júzege asyrylǵan, al basqa aýdandarda pılottyq jobany júzege asyrýǵa daıyndyq jumystary júrgizilýde.
Aıta ketsek, ótken jyly memlekettik korporasııa jumyskerleri 1 jáne 2 toptyq múgedektigi bar azamattarǵa 39 myńǵa jýyq qyzmetti úıinde kórsetken.