Senat depýtaty Darhan Qaletaev 2020 jylǵa deıin óńirlerdi damytý baǵdarlamasy aıasynda baspana alýǵa úmitti otbasylar úshin jas aralyǵyn ulǵaıtýdy usyndy, dep habarlaıdy abctv.kz.
Qaletaev beısenbi kúni senattyń jalpy otyrysynda sóılegen sózinde QR premer-mınıstri Baqytjan Saǵyntaevtyń atyna osyndaı saýal saldy.
2020 jylǵa deıin óńirlerdi damytý baǵdarlamasyna sáıkes, birneshe baǵyttar boıynsha qol jetimdi baspana salý qarastyrylady.
«Alaıda baspana alýǵa úmitti otbasylar úshin jas shekteýi bar», — dep atap ótti Qaletaev. Máselen, bir sanat boıynsha, erli-zaıyptylar úsh jyl otasqan, bir balaly jáne 35 jasqa tolmaǵan bolýy tıis. Ekinshi bir sanat boıynsha, jas otbasynyń nekeleskenine eki jyldan aspaýy kerek jáne erli-zaıyptylardyń jasy 29-dan aspaýy shart.
Senatordyń aıtýynsha, qazirgi tańda baspana máselesi jastar arasynda óte ózekti bolyp otyr. Sol sebepti nekelesý jasy da alǵa jyljydy.
Qaletaev málimdegendeı, mundaı jaǵdaıda otbasylar úshin jas talaptaryn ózgertý qajet.
«Qurmetti Baqytjan Ábdiruly, bir sanat boıynsha jas aralyǵyn 35-ten 39 jasqa deıin ulǵaıtýdy, al «jas otbasy» sanaty boıynsha 29 jastan 35 jasqa deıin belgileýdi qarastyrýyńyzdy suraımyn», — dedi Qaletaev premer-mınıstrge.