2 naýryz kúni Qyzylorda oblysynyń ákimi Qyrymbek Kósherbaev jergilikti polısııa qyzmetiniń daıyndyǵyn tekserip, 11 avtokóliktiń kiltin tabystady. Olar – 2 avtobýs, 2 «Gazel», sondaı-aq «Nıva» markaly 7 avtokólik aýdandyq ishki ister bólimderine tabystaldy.
- Sońǵy 4 jylda ishki ister organdarynyń materıaldyq-tehnıkalyq bazasyn nyǵaıtý men zamanaýı qural-jabdyqtarmen qamtamasyz etýge jergilikti bıýdjetten 5,7 mlrd. teńgeden asa qarjy bólindi. Onyń ishinde, departamenttiń «Jedel basqarý ortalyǵy» tolyq jańǵyrtylyp, iske qosyldy. Kósheler men turǵyn úı aýlalary jáne adamdar kóp shoǵyrlanatyn jerlerge beınebaqylaý kameralary ornatyldy. Jol-patrýldik polısııa qurylymy arnaıy qurylǵylarmen jabdyqtalǵan 130 qyzmettik avtokóliktermen qamtamasyz etildi. Búgingi tapsyrǵaly otyrǵan jańa avtokólikter aldaǵy ýaqytta polısııa qyzmetkerlerine qoǵamdyq tártip pen qaýipsizdikti qamtamasyz etip, qylmyspen kúresti qarqyndy jalǵastyrýǵa, turǵyndardyń tynysh ta, ýaıymsyz ómir súrýine óz septigin tıgizip, jumys sapasyn arttyra túsedi degen senimdemin,- dedi oblys ákimi.
Sondaı-aq aımaq basshysy Qyzylorda oblysy IID qyzmetkerleriniń jumysymen, materıaldyq-tehnıkalyq bazasymen jáne kásibı qyzmettik daıyndyqtarymen tanysty.
Jalpy alǵanda, oblysta krımınogendik jaǵdaı turaqty dep baǵalanady. Oblysta ótken jyly tirkelgen qylmys sany 20 paıyzǵa tómendegen, bul - elimiz boıynsha óte jaqsy kórsetkish. Qylmystyń azaıýyn barlyq baǵyt boıynsha baıqaýǵa bolady. Máselen, aýyr qylmys 10 paıyz, urlyq 12 paıyz, buzaqylyq 46 paıyz, alaıaqtyq 30 paıyz, qoǵamdyq oryndarda jasalǵan qylmys 21 paıyzǵa tómendep otyr.