2017 jyly respýblıka boıynsha 410 aýyl sharýashylyǵy kooperatıvi qurylady. Bul jaıynda búgin QR Aýyl sharýashylyǵy birinshi vıse-mınıstri Qaırat Aıtýǵanov málim etti, dep habarlaıdy QazAqparat.
Mınıstrliktiń keńeıtilgen alqa májilisinde negizgi baıandama jasaǵan onyń aıtýynsha, ótken jyly Elbasynyń tapsyrmasyna sáıkes shaǵyn jáne orta sharýashylyqtardy kooperatıvke tartý jumystary qolǵa alynǵan.
«15 myń jeke qosalqy sharýashylyqty qamtyǵan 157 kooperatıv quryldy. Olardyń bazasynda júzden astam sút qabyldaıtyn pýnkt pen 7 myń otbasylyq bordaqylaý alańy uıymdastyryldy. Tolyqtaı alǵanda, ındıkatıvti josparlar barlyq oblystar boıynsha oryndaldy», – dedi ol.
Vıse-mınıstrdiń aıtýynsha, bıyl jergilikti atqarýshy organdar 410 kooperatıv quratyn bolady.
«Tolyqtaı alǵanda aldaǵy 5 jylda kooperatıvter qyzmetimen jarty mıllıon jeke qosalqy sharýashylyq pen shaǵyn sharýashylyqtar qamtylatyn bolady. Kooperatıvter ónimderdi daıyndaýǵa, saqtaýǵa jáne tasymaldaýǵa kómektesedi. Buǵan qosa, veterınarııa mal azyǵyn daıyndaý, agrohımııa jáne óz múshelerine nesıe berýde járdemdesedi. Jalpy kooperatıvter aýyldardyń odan ary damýynyń negizi bolýy tıis», – dedi Aıtýǵanov.